ސިމެންތި ބަރުކޮށްގެން މާލެ އިން ފުރައިގެން ޅ. މާބިންހުރައަށް ދަތުރުކުރި ޗަމްޕާ ހޯލްޑިންގްސްގެ ކޮޅުވެެއްޓިއެއް ރޭ ދަންވަރު ބަންޑުން ޖަހައިލައި، އަޑިއަށް ހިނގައްޖެއެވެ.
އެމްއެންޑީއެފުން ބުނީ 35 ފޫޓުގެ މި ކޮޅުވެއްޓީގައި ތިބި ބަންގްލަދޭޝްގެ ތިން ފަޅުވެރިންނާއި ދިވެހި ކައްޕި އަށް މި ހާދިސާގައި އެއްވެސް އަނިޔާއެއްނުވެ ސަލާމަތްވެފައިވާ ކަމަށެވެ.
ދެ ކޮންޓެއިނަރުގެ ސިމެންތި ބަރުކޮށްގެން ދަތުރުކުރަމުން ދިޔަ ކޮޅުވެއްޓި ބަންޑުން ޖަހާލިކަމުގެ ރިޕޯޓް އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައި ވަނީ ދަންވަރު ތިނެއް ޖަހަން އުޅެނިކޮށް ކަމަށާއި ރިޕޯޓް ލިބުމާއެކު އެމްއެންޑީއެފް ނޮދަން އޭރިއާ ކޯސްޓްގާޑުން ވަނީ އެ ސަަރަހައްދަށް ގޮސް ހަރަކާތްތެރި ވެފައި ކަމުގައި އެމްއެންޑީއެފުން ބުންޏެވެ. ކޮޅުވެއްޓި ބަންޑުން ޖަހާލައިފައިވަނީ މާފިލާފުށި ކައިރިންނެވެ.
ކޮޅުވެއްޓި އަޑިއަށް ދިޔައީ މިއަދު ހެނދުނު ހަތެއް ޖަހަން ކައިރިވެފައި ހުއްޓާ ކަމަށް ވެސް އެމްއެންޑީއެފުން ބުނެއެވެ.