ކޮވިޑް ޖެހިގެން ހުޅުމާލެ މެޑިކަލް ފެސިލިޓީގައި އެޑްމިޓްކޮށްފައި އޮތް ބަލިމީހެއްގެ ގައިގައި، އޭނާ އެހީތެރިއެއްގެ ގޮތުގައި ހަމަޖައްސާފައި ހުރި ބަނގްލަދޭޝް މީހާ ތަޅައި އަނިޔާކުރި މައްސަލައިގެ ޝަރީއަތް ނިމެންދެން އޭނާ ބަންދުކުރަން އަމުރުކޮށްފިއެވެ.

ހުޅުމާލެ މެޑިކަލް ފެސިލިޓީގައި 26 މޭގައި މި ހާދިސާ ހިނގުމާ ގުޅިގެން، 31 އަހަރުގެ ޝަރީފް ޚާން ހައްޔަރުކޮށް، ފުލުހުން ވަނީ މައްސަލަ ތަހުގީގުކޮށްފައެވެ. އަދި ޝަރީފް ޚާންގެ މައްޗަށް، ޤާނޫނު ނަންބަރު: 9/2014 (ދިވެހިރާއްޖޭގެ ޤާނޫނުލް ޢުޤޫބާތު) ގެ 120 ވަނަ މާއްދާގެ (ހ) ގެ (1) ވަނަ ނަންބަރާ ޙަވާލާދީ، އެ މާއްދާގެ (ށ) ގެ 2 ވަނަ ނަންބަރުގެ ދަށުން، އަނިޔާއެއް ދިނުމުގެ ކުށުގެ ދަޢުވާ ދައުލަތުގެ ފަރާތުން ހުޅުމާލެ މެޖިސްޓްރޭޓް ކޯޓަށް ހުށަހެޅީ މިއަދު ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެއެވެ.

ބަލި މީހާގެ ގައިގައި ޝަރީފު ހާން ޖެހިކަން ފަޅާއެރީ، ހުޅުމާލެ މެޑިކަލް ފެސިލިޓީގައި، އެ ބަލި މީހާގެ އެނދުގެ ކުރިމަތީގައި ހުރި އެނދެއްގައި އޮތް މީހަކު އެ މަންޒަރުގެ ވީޑިއޯ ނަގައި، ހާމަކުރުމުންނެވެ. އެ ވީޑިއޯ މީސްމީޑިއާގައި ވަނީ އާންމުވެފައެވެ.

އެ ވީޑިއޯ އިން ފެންނަ ގޮތުގައި ޖާނުން ވަރުގަދަ ބަންގާޅީ މީހާ، ބަލި މީހާގެ މޫނުމަތީގައި ވަރަށް ބާރަށް ޖަހައެވެ. މުޅި ތަނަށް އަޑު އިވެއެވެ. އެއާއެކު އޭނާ ވަރަށް ބާރަށް ރޯންފަށައެވެ. ރޯން ފެށީމާ ވެސް އެ މީހާ ގޮސް، ދެ ވަނަ ފަހަރަށް ވެސް ޖަހަން ވެގެން އަތް މަޅައިލައެވެ. ބަލި މީހާ ރުއިން ހުއްޓާލީ ބިރުން، އެ ހިސާބުންނެވެ.

Hulhumale Medical Facility gai oi bali meehegge kanfai matheega, aailaage faraathun, eheetheriyakah bahattaafai huri bangaalhee aku varah baarah miadhu jahaifi. Heyonuvaane mihen hadhan. pic.twitter.com/7MGIAsQlq8

— fisaarithedhu (@fisaarithedhu) May 26, 2021

• ވިދާޅުވުމަށް: ހުޅުމާލެ މެޑިކަލް ފެސިލިޓީގައި އޮތް ބަލި މީހެއްގެ މޫނުމަތީގައި ބަންގާޅީ އެހީތެރިއަކު ވަރަށް ބާރަށް ޖެހި މައްސަލަ ބަލަނީ