ލިޔުންތެރިޔާ: ކޮޕީ މުޙައްމަދު ރަޝީދު

ކޮޕީ މުޙައްމަދު ރަޝީދަކީ ރާއްޖޭގައި ކުރިން ނެރުނު ބައެއް ނޫސް މަޖައްލާތަކުގައި، ޅެން ޝާއިޢު ކުރެއްވި ބޭފުޅެކެވެ. މީގެ ތެރެއިން، ދުވަހު ނޫސް "މޫންލައިޓް" އާއި "އެކުވެރިންގެ ރޫޙު" މަޖައްލާގައި ޝާއިޢު ކުރެއްވުމުގެ އިތުރަށް ފަތްތޫރައިގައި ވެސް، މުޙައްމަދު ރަޝީދުގެ ޅެންތައް ޝާއިޢު ކުރައްވާފައިވެއެވެ. މުޙައްމަދު ރަޝީދަކީ މަދަރުސާ ކުދިންގެ ލަވަ މުބާރާތްތަކަށާއި ލަވަ އަލްބަމްތަކަށާއި ޤައުމީ މުނާސަބަތުތަކަށާއި އެކިއެކި ޚާއްޞަ ޙަފްލާތަކަށް ގިނަ އަދަދަކަށް ލަވަވެސް ހައްދަވައިދެއްވާފައިވާ ބޭފުޅެކެވެ. މަދަރުސާ ކުދިންގެ ލަވަމުބާރާތްތަކަށް ރީތި ޅެންތައް ވެސް ހައްދަވައިދެއްވައިފައިވެއެވެ. ދިވެހި އަދަބިއްޔާތަށް ޚިދްމަތްކުރުމުގެ ދާއިރާއިން؛ ތާނަޢަރަބި ލިޔުމުގެ ރޮނގުން ހިތްވަރު ދިނުމުގެ ގައުމީ އިނާމު 1988ވަނަ އަހަރު ލިބިވަޑައިގެންފައިވެއެވެ. އަދި ޅެންހެދުމުގެ ރޮނގުން ހިތްވަރު ދިނުމުގެ ގައުމީ އިނާމު 2005ވަނަ އަހަރު ލިބިވަޑައިގެންފައިވެއެވެ.