ވައިން ކަރަންޓު އުފައްދައިދޭ ދުނިޔޭގެ އެންމެ އުސް ބުރަފަތި ނުވަތަ ވިންޑް ޓާބައިން ޖަރުމަނުގައި ބަހައްޓައިފިއެވެ.

އުސްމިނުގައި 1،197 ފޫޓު (365 މީޓަރު) ހުރި މި ވިންޑް ޓާބައިން ބަހައްޓައިފައިވަނީ ބްރެންޑަންބާގް ޓައުންގެ ޝިޕްކައު މުނިސިޕަލިޓީގައެވެ.

ފްރާންސްގެ ވެރިރަށް ޕެރިސްގައި ހުންނަ އައިފަލް ޓަވަރަށްވުރެވެސް އުސް މި ވިންޑް ޓާބައިނުން 3.8 މެގަވޮޓްގެ ކަރަންޓު އުފައްދައިދޭނެ ކެޕެސިޓީ އެބަހުއްޓެވެ.

ބުރަފަތި ހަރަކާތްތެރިކުރުވާ ހަބް ހުރީ ބިމުން ފެށިގެން 300 މީޓަރު (984 ފޫޓު) އުހުގައެވެ. މިހެންވެ، ވަރުގަދަކޮށް އަދި އެއްވަރެއްގައި ބުރަފަތި އެނބުރެން ބޭނުންވާ ވަރުގަދަ ވައި ލިބުމަށް މަގުފަހިވުމުން އާދައިގެ ބުރަފައްޗަކަށްވުރެ މި ބުރަފަތިން ކަރަންޓު އުފެއްދޭ މިންވަރު ދެ ގުނަ އިތުރުވާނެކަމަށް، މި ބުރަފަތި ބެހެއްޓި ޖީ.އައި.ސީ.އޯ.އެން ކުންފުނިން ބުންޏެވެ.

މިއީ ޖަރުމަނުގެ ދެވަނައަށް އެންމެ އުސް ބިނާއެވެ. މި އަށްވުރެ އުހީ ވެރިރަށް ބާލިންގެ 368 މީޓަރު (1،207 ފޫޓު) އުސް ޓީވީ ޓަވަރެވެ.

"ތިން ސަތޭކަ ފަސްދޮޅަސް ފަސް މީޓަރު – މިއީ އަހަރެމެންގެ މުޅި ޓީމަށްވެސް ވަރަށް އުފާވެރި، އަސަރުގަދަ ވަގުތުކޮޅެއް،" އެ ކުންފުނީގެ ސީ.އީ.އޯ ޔޮކަން ގްރޮސްމަން ބުންޏެވެ.

މި ބުރަފަތި ރަސްމީކޮށް އިފްތިތާހުކުރަން ހަމަޖައްސައިފައިވަނީ އަންނަ މަހު 19 ގައެވެ. އަދި އިތުރު ޓެސްޓްތައްވެސްކުރާނެއެވެ.