ތަފާތު ސަބަބުތަކާ ހެދި، ދަރިމައިވުމުގެ ދަތިތަކާ ކުރިމަތިލާ މީހުންގެ އަދަދު ދަނީ އިތުރުވަމުންނެވެ. މި ދަތިތަކަށް ހައްލެއް ހޯދައިދިނުމަށް ދުނިޔޭގައި މިހާރު އެންމެ ކުރިއަރަމުން އަންނަ އެއް ސިނާއަތަކީ ދަރިމައިކުރުމުގެ ސިނާއަތް ނުވަތަ "ބިގް ފާޓިލިޓީ" އެވެ. މި ސިނާއަތް މިއަދު އިސްތިހާރުވެފައިވަނީ ދަރިން ނުލިބޭ ދެމަފިރިންނަށް ދަރިން ހޯދަން އެހީތެރިވެދޭ އޯގާތެރި ދާއިރާއެއްގެ ގޮތުގައެވެ.
ބައެއް މީހުން ދަރިޔަކު ހޯދަން، ދަތި ހާލުގައި، ގިނަ އަހަރުތަކެއް ވަންދެން ލާރި އެއްކޮށްގެން މިފަދަ ހިދުމަތްދޭ ފަރާތްތަކުގެ އެހީ ހޯދާއިރުގައި، މި ސިނާއަތުގެ އަނދިރި ފަރާތްވެސް ފާޅުވާން ފަށައިފިއެވެ. މި ފަދަ ފާޓިލިޓީ ސެންޓަރުތައް މިހާރު ބަދަލުވެފައިވަނީ ދުނިޔޭގެ ނުފޫޒު ގަދަ، އާދަޔާ ހިލާފަށް މުއްސަނދި ފިރިހެނުން އެމީހުންގެ ބާރު ދެއްކުމަށް، ގިނަ އަދަދެއްގެ ދަރިން އުފެއްދުމަށް ބޭނުންކުރާ "ޒަމާނީ ހަރަމް" ތަކަކަށެވެ. މާޒީގައި ރަސްރަސްކަލުންނާއި ބާރުގަދަ މީހުން ޖާރިޔާއިންނާއި އަޅު އަންހެނުން އެމީހުންގެ ދަރިފަސްކޮޅު އިތުރުކުރަން ގެންގުޅުނު އުސޫލު، މިއަދު މިވަނީ ސައިންސާއި ޓެކްނޮލޮޖީގެ ނަމުގައި އަލުން އިއާދަވާން ފަށައިފައެވެ.
މަތީ ފޮޓޯގައި (ހުސްގަޔާ) ހުރި މަޝްހޫރު މެސެޖިން އެޕް ޓެލެގްރާމްގެ ބާނީ ޕަވެލް ޑުރޯވްގެ ވާހަކައަކީ މީގެ ކުލަގަދަ މިސާލެކެވެ. އޭނާގެ ދަރިފަސްކޮޅު ގިނަކުރުމަށް ދަރިން ނުލިބޭ އަންހެނުންނަށް ފައިސާ ދީ، އެމީހުން ދަރިމައިވުމަށް އޭނާގެ ދަރިފަނި ބޭނުންކޮށްގެން، މިހާތަނަށް 100 އަށްވުރެ ގިނަ ދަރިން ތިބިކަމަށް އޭނާ ވަނީ ފަހުރުވެރިކަމާއެކު ހާމަކޮށްފައެވެ. އޭނާ މިކަން ސިފަކޮށްފައިވަނީ ދަރިމައިވުމުގެ މައްސަލަތަކަށް އޭނާ ދުނިޔެއަށް ވެދިން ދީލަތި އެހީތެރިކަމެއްގެ ގޮތުގައެވެ.
މި ވިސްނުން ގެންގުޅޭ ނުފޫޒު ގަދަ އަނެއް މީހަކީ މަޝްހޫރު އީލޮން މަސްކެވެ. އޭނާ ގަބޫލުކުރާ ގޮތުގައި ދުނިޔެ ސަލާމަތްކުރުމަށްޓަކައި "ވިސްނުން ތޫނު" މީހުން ގިނަ ދަރިން ހޯދަންޖެހެއެވެ. މަސްކްގެ 14 ދަރިން ތިބިއިރު، މީގެ ތެރެއިން ގިނަ ކުދިންނަކީ އައި.ވީ.އެފް އާއި ސަރޮގޭސީ މެދުވެރިކޮށް ހޯދައިފައިވާ ކުދިންނެވެ. މިއީ އާއިލީ ދިރިއުޅުމަކަށްވުރެ ބޮޑަށް، އަމިއްލަ ނަސްލު ފެތުރުމަށް ކުރެވޭ އިންޖިނިއަރިން މަސައްކަތެކެވެ.
މިކަމަކީ މިހާރު މުއްސަނދިންގެ ތެރޭގައި އާންމު ކަމަކަށް ވާން ފަށައިފިއެވެ. ޗައިނާގެ ބިލިއަނަރުން އެމެރިކާގެ އަންހެނުންގެ ރަހިމު ކުއްޔަށް ހިފައިގެން އެތައް ސަތޭކަ ކުދިންނެއް އުފައްދަމުންދާ ކަމުގެ ރިޕޯޓްތައް ވަނީ ފެންމަތިވެފައެވެ. ފެށިފައިވާ މި ވިޔަފާރީގެ ސަބަބުން މިކަމުގައި އުފަންވާ ކުޑަކުދިން ބަދަލުވެގެންދަނީ ގައުމީ އަދި އިގްތިސާދީ ބާރުވެރިކަން ހޯދުމަށް ބޭނުންކުރާ "މުދަލަކަށެވެ." މި އުސޫލަކީ ޖެންގިޒް ހާން ފަދަ ތާރީހީ ލީޑަރުން ބާރުގެ ބޭނުންކޮށްގެން ދަރިން އުފެއްދި އުސޫލާ ދާދި އެއްގޮތް ކަމެކެވެ.
މިފަދަ ގޮތްގޮތަށް އުފަންކުރާ ކުދިންނަށް ކުރިމަތިވާ އެންމެ ބޮޑު މައްސަލައަކީ އަމިއްލަ ވަޒަންވެރިކަމާއި އަމިއްލަ ނަފްސުގެ މައުލޫމާތު އޮޅުންބޮޅުންވުމެވެ. ސައިންޓިފިކް ދިރާސާތަކުން ދައްކާ ގޮތުގައި، ކުއްޖަކު އެންމެ ފުރިހަމައަށް ބޮޑުވަނީ އޭނާގެ އަސްލު މަންމައާއި ބައްޕަގެ ލޯތްބާއި އަޅާލުން ލިބިގެންނެވެ. ނަމަވެސް، ސަތޭކަ ދަރިން ތިބޭ ބައްޕައަކަށް ކޮންމެ ކުއްޖަކަށް ދޭންޖެހޭ ވަގުތާއި، ލޯތްބާއި، މަސްއޫލިއްޔަތު އަދާކުރުމަކީ އިންސާނީ ގޮތުން ކުރެވޭނެ ކަމެއް ނޫނެވެ. މި ކުދިން ބޮޑުވަމުން އަންނަނީ އެކުދިންގެ ބަޔޮލޮޖިކަލް މަންމަ ނުވަތަ ބައްޕަގެ މައުލޫމާތު ނޭނގި، އަމިއްލަ މާޒީއާ މެދު ހިތާމަކުރާ ހާލުގައެވެ. މިއީ އިންސާނީ ހައްގުތަކަށް އުނިކަން އަންނަ، އަދި ކުދިންގެ ނަފްސާނީ ދުޅަހެޔޮކަމަށް ނުރައްކާވާ ކަމެކެވެ.
މި ނިޒާމުގެ ތެރެއިން އުފަންވާ ކުދިންނަކީ ގިނަ ފަހަރަށް ވަކި މަގްސަދުތަކަކަށް ފަރުމާކުރެވިފައިވާ ކުދިންނެވެ. ވިޔަފާރިތައް ހިންގުމަށާއި، މުދާ ރައްކާތެރިކުރުމަށް އުފައްދާ މިފަދަ "ދަރިކޮޅުތަކުގައި" ކުދިންގެ މެދުގައި ވާދަވެރިކަމާއި، ވަކިވަކި ގިންތިތައް އުފެދެއެވެ. މިއީ އާއިލީ ގުޅުމުގެ ބަދަލުގައި "ޑައިނާސްޓީ މެނޭޖްމަންޓް" ނުވަތަ ރަސްކަމެއް ހިންގުން ފަދަ ކަމެކެވެ.
advertisment
