ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި އެމް.ޑީ.ޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކާޓޫންތަކެއް މީސްމީޑިއާގައި ހިއްސާކުރި މައްސަލައާ ގުޅިގެން އެމްޑީޕީގެ ފިޔަވަޅު އަޅާ ކޮމިޓީގެ ނައިބު މުގައްރިރު ފުރަހަނި ޝުވެއިބު އަލީ ސަސްޕެންޑްކޮށްފި އެވެ.

ފިޔަވަޅުއަޅާ ކޮމެޓީއަށް ހުށަހެޅި، ބަލަމުންދާ މައްސަލައަކާ ގުޅިގެން، ކޮމެޓީގެ ނައިބު މުޤައްރިރު ކަމުންނާއި ކޮމެޓީގެ މެމްބަރުކަމުން ޝުޢައިބު ޢަލީ (ފުރަހަނި) އެކޮމެޓީން އެއްފަރަާތް ކޮށްފި

— MDP Secretariat (@MDPSecretariat) September 17, 2020

އެމްޑީޕީގެ ސެކްރެޓޭރިއަޓުން ބުނީ އެ ޕާޓީގެ ފިޔަވަޅު އަޅާ ކޮމިޓީއަށް ހުށަހެޅިފައިވާ މައްސަލައަކާ ގުޅިގެން އެ ކޮމިޓީގެ ނައިބް މުގައްރިރު ކަމުންނާއި ޕާޓީގެ މެމްބަރު ކަމުން ޝުއައިބު އެކަހެރިކޮށްފައިވާ ކަމަށެވެ.

އެ ކާޓޫނުތަކާއެކު، ޝުއައިބު ކުރައްވާފައިވާ ޓުވީޓެއްގައި މިއަދު ވިދާޅުވެފައި ވަނީ އެނާ ސަސްޕެންޑްކޮށްފައި ވަނީ ރައީސް ސޯލިހާއި ރައީސް ނަޝީދުގެ ކާޓޫން އެއް ކުރެހި މައްސަލައަކާ ގުޅިގެން ކަމަށެވެ.

Breaking News:

MDP ge veringe cartoon kurehi massala eggai alhugandu suspend koffi @MohamedNasheed @anedhivehirajje @ibusolih @HassanLatheef @MDPSecretariat pic.twitter.com/xXWodi3LUz

— Shuaib Ali ???????? (@ShuaibMaldives) September 17, 2020

ޝުއައިބުގެ މައްސަލައެއް އެމްޑީޕީގެ ފިޔަވަޅުއަޅާ އެކޮމީޓީއަށް ހުށަހެޅިގެން ބަލަން ފަށައިފައި މިވަނީ އަމިއްލަ މަސްލަހަތު އިސްކުރައްވައިގެން ޕާޓީގެ އަސާސީ ގަވާއިދާ ހިލާފަށް ނަޝީދު އަމަލް ކުރައްވަމުން ގެންދަވާ ކަމަށް ތުހުމަތުކޮށް، އެކަންކަން ހުއްޓުވައިދިނުމަށް އެމްޑީޕީގައި އެދިވަޑައިގެންފައިވަނިކޮށެވެ. މީގެ އިތުރުން، ވެރިކަމުގެ ނިޒާމް ބަރުލަމާނީ އަކަށް ބަދަލުކޮށް، ބޮޑު ވަޒީރަކަށް ވެވަޑައިގަތުމަށް ރައީސް ނަޝީދު ކުރައްވަމުން ގެންދަވާ މަސައްކަތް ހަގީގަތަކަށް ހައްދަވަން ނަޝީދު މަސައްކަތް ކުރައްވާ ކަމަށާއި އެކަމުގައި ޕާޓީ ގުރުބާންވެގެން ދިއުމަކީ ގަބޫލްކުރެވޭނެ ކަމެއް ނޫން ކަމަށް އޭނާ ވަނީ ވިދާޅުވެފައެވެ.

އިކޮނޮމިކް މިނިސްޓަރު ފައްޔާޒު އިސްމާއިލް މަގާމުގެ މަސްއޫލިއްޔަތުން އެކަހެރިވެވަޑައިގަތުމަށް ރައީސް ނަޝީދު އެންގެވި ހިސާބުން މައްސަލަ ވަނީ ހޫނުވެފަ އެވެ. އަދި އެމްޑީޕީގެ ރައީސްގެ ހައިސިއްޔަތުން ނަޝީދު އެގޮތަށް އެންގެވި ނަމަވެސް އެމަގާމަކީ ރައީސް ސޯލިހް އޭނާއަށް ދެއްވާފައިވާ މަގާމެއް ކަމަށާއި ރައީސް ސޯލިހް އިތުބާރު ކުރައްވާހާ ހިނދަކު މަގާމުގައި ދެމި ހުންނަވާނެ ކަމަށް ފައްޔާޒު ވަނީ ވިދާޅުވެފަ އެވެ.

ނަޝީދަށް ފިޔަވަޅު އަޅައިދިނުމަށް އެދި ޝުއައިބުގެ އެމްޑީޕީއަށް ސިޓީއެއް ފޮނުއްވާފައި ވަނީ ވެސް ފައްޔާޒު އެކަހެރިވެވަޑައިގަތުމަށް ނަޝީދު އެދިވަޑައިގަތުމާ ގުޅިގެންނެވެ. ނަމަވެސް އެމްޑީޕީން ވަނީ ޝުއައިބުގެ ތުހުމަތުތައް ދޮގުކޮށް، ނަޝީދު އެގޮތަށް ފައްޔާޒަށް އެންގެވީ ޕާޓީގެ ރައީސްގެ ހައިސިއްޔަތުން ކަމަށް ބުނެފަ އެވެ.