ރަހްމަތްތެރިއެއްގެ ފިރިހެން ދަރިފުޅު ފުރާވަރަށް އަޅައިފިއެވެ. އަދި އާ ކުޅިވަރެއް ވެސް ދަސްކޮށްފިއެވެ؛ ރާޅާއަޅާށެވެ.

މި ދާއިރާއަކީ ވަކި ލައިފްސްޓައިލެއް ގެންގުޅޭ ކުޅިވަރެކެވެ. އިސްތަށިގަނޑު ބަހައްޓާ ގޮތުން ފެށިގެން ލާ ޓީޝާޓާއި ސޯޓާއި އަރާ ފައިވާނަކީ ވެސް އެހެން މީހުންގެ އާއްމު ލައިފްސްޓައިލާ މުޅިން ތަފާތު އެއްޗެކެވެ.

ދެން އޮތީ ގަހަނާގެ ވާހަކައެވެ. މިއީ ވެސް ތަފާތު ސްޓައިލެކެވެ. ފައިގައި އަދި އަތުގައި އަޅާ ކެވެލިކޮޅަކީ ވެސް އާއްމު ނުވަތަ "މެއިންސްޓްރީމް" ސަގާފަތުގައި އުޅޭ މީހުންނާ ތަފާތު އެއްޗެއްސެވެ.

މި ހުރިހާ ކަމަކަށް ވިސްނައިފައި އަހަރެން ނިންމީ ރަހްމަތްތެރިޔާގެ ރާޅާއަޅާ ދަރިފުޅަށް ފައިގައި އަޅާ "ގުދުރަތީ" ތަކެތިން ހަދައިފައިވާ ކެވެލިކޮޅެއް ގަންނާށެވެ. އަދި މީތި ލިބޭނެ ޔަގީންކަން އޮތް ތަނަށް ސީދާ ދިޔައިމެވެ: އެއީ ފަރީދީ މަގުގައި ހުންނަ "މަންޝާ އޮންލައިން" ޝޮޕިން މޯލްއެވެ.

ޗާންދަނީމަގުގައި ވެސް ފިހާރަތައް ހުންނަ، "މަންޝާ މަނިކު"ގެ ނަމުން މަޝްހޫރު އިބްރާހީމް އަހްމަދު ނުވަތަ މަނިކު ސޭޓު ހިންގާ މަންޝާ އޮންލައިންއަށް ވަދެވުމާއެކު ފުރަތަމަ ވެސް ވަދެވުނު މޮޔަ ހިތަށް އެރިއެވެ. ނަމަވެސް އެއީ ރަނގަޅު މާނައިގައެވެ. ވާ ގޮތަކީ އަހަރެންނަށް މާ ގިނަ ޗޮއިސް ލިބުމުން ހަދާނެ ނަހަދާނެ ގޮތެއް ނޭނގޭތީއެވެ. އެ ގޮތުން އެ ބޮޑު ފިހާރާގައި "ކޫސަނި" އެތައް "ސުވެނިއާ"ތަކެއް ހުރުމުން އޭގެ ތެރެއިން ހޮވާލާނެ ހަދިޔާއެއް ނިންމަން ފުރަތަމަ ނޭނގުނެވެ.

މިހެންވެ އަހަރެން ހިތަށް އެރީ ވަގުތު ހޭދަކޮށްލައިގެން ވެސް އެންމެ ކަމުދާ ކެވެލިކޮޅު ފެނޭތޯ ބަލާށެވެ.

ތަފާތު ބާވަތުގެ ކީޗެއިން ނުވަތަ ތަޅުދަނޑިލާ އެއްޗެހިން ފެށިގެން ކަރުގައި އަޅާ ފަށާއި ކަންފަތުގައި ލާ މުންޖާއި އަތުގައި އަޅާ އުޅާތައް ވެސް ފެނުނެވެ. ދެން ފެނުނީ އަހަރެން ބޭނުންވި ކަހަލަ އެއްޗެވެ. ކުދިބޮލިން ހަދައިފައިވާ ފައިގައި އަޅާ ކެވެލިކޮޅެކެވެ.

މާލޭގައި ޓޫރިސްޓުންނަށް ސުވެނިއާ ވިއްކާ ސަރަހައްދުގައި މަންޝާ އޮންލައިން ހުންނާތީ އަހަރެންގެ ހިތަށް އެރީ މި ކަހަލަ ކުޑަ ކެވެލިކޮޅެއްގެ އަގު ވެސް އެއް މަހުގެ މުސާރައަށް އަރާނެ ކަމަށެވެ. ނަމަވެސް ވީކީ އެހެނެއް ނޫނެވެ. އެ ކެވެލިކޮޅުގެ އަގަކީ އެންމެ 30ރ. އެވެ. ކަޑައެއްގައި ކޮފީ ތައްޓެއްގެ އަގެވެ. ރަށްރަށުން އަންނަ ދިވެހިންނާއި ރިސޯޓް/ ގެސްޓް ހައުސްތަކުގެ ޝޮޕްތަކުގެ ވެރިންނާއި ބިދޭސީ ފަތުރުވެރިންގެ މެދުގައި ވެސް މަޝްހޫރުވެފައިވާ ފަދައިން މަންޝާ އޮންލައިންއަކީ ހުރިހާ އެއްޗެއް ވެސް އަގުހެޔޮ ތަނެއް ކަމަށް އަރާފައިވާ އަޑަކީ ހަގީގަތުގައި ވެސް ތެދެއްކަން އަހަރެންނަށް އެ ވަގުތު އެނގުނެވެ.

ކައުންޓަރަށް ގޮސް ކެވެލިކޮޅަށް ފައިސާ ދައްކަން ހުއްޓާ ފިހާރައަށް ވަދެގެން އައީ މުޅި ރާއްޖެއަށް މަޝްހޫރު މަނިކު ސޭޓެވެ. އަހަރެން ވެސް ފޭސްބުކްގައި އުޅޭތީ މަނިކު ސޭޓުގެ "ފްރެންޑްސް އޮފް ފްރެންޑްސް" ނުވަތަ "ރަހްމަތްތެރިންގެ ރަހްމަތްތެރިން"ނާ އަހަރެން ވެސް ގުޅުން އޮންނާތީ މަނިކު ސޭޓުގެ ދުވަހުގެ ހަރަކާތްތައް އަހަރެންނަށް ވެސް ފެނެއެވެ. މީސްމީހުންނާ ބަހައްޓާ ގާތްކަމާއި ހިތްހެޔޮކަމެވެ.

އަހަރެންނަކީ ކާކުކަން ތައާރަފުވެލުމުން މަނިކު ސޭޓު ވެސް އޭނާގެ ބައެއް ވާހަކަތައް ކިޔައިދިނެވެ. ވިޔަފާރީގައި 34 އަހަރުވީ ދިގު ދަތުރުގައި ކާމިޔާބު ހޯދުމަށް ލޯނު ނުނަގާ ވާހަކަ އާއި ނަޒާހަތްތެރިކަން ގެންގުޅުނު ގޮތުގެ ވާހަކައެވެ.

"ނަމަވެސް ހަޔާތުގައި އެންމެ ބޮޑު ގޮންޖެހުމަކީ 12 ދަރިން ބެލެހެއްޓުން. އެކަމަކުވެސް މާތް ﷲގެ އިރާދަފުޅުން އެ ކުދިން ވެސް ރަނގަޅަށް ބަލަހައްޓަން. އަހުލާގު ރަނގަޅުކުރަން ވަރަށް ޑިސިޕްލިންކޮށް އެ ކުދިންނާމެދު ކަންތައްތައްކުރަނީ،" މަނިކު ސޭޓު ބުންޏެވެ.

ކުޑަކޮށް ވާހަކަ ދައްކައިލައިފައި އަހަރެން ދާން އުޅެން ފެށުމުން މަނިކު ސޭޓާ ބައްދަލުވާ މީހުންނަށް އޭނާ ހަދިޔާކުރާ "ސަޕްރައިޒް" ވެސް އޭނާ އަހަރެންނަށް ދޭން ނިންމިއެވެ. އަހަރެން ޝުކުރު އަދާކުރީމެވެ.

"މި ތަނުން އެއާފްރައިޓް ވެސް ކޮށްދެން. އަދި މާލެ އާއި ހުޅުމާލެ އާއި އުޅަނދުފަހަރާ ހަމައަށް ވެސް ބައިގަޑިއިރާއި އެއްގަޑިއިރާ ދޭތެރޭގައި ފޯރުކޮށްދެން. ތިޔަ ބޭފުޅާ ވެސް ގެއަށް ގޮސްފައި މި ތަނަށް ގުޅައިލުމުން 30 މިނެޓް ތެރޭ ފޮނުވައިދޭނަން. އަޖުމަ ބަލައިލާ!" މަނިކު ސޭޓު ބުންޏެވެ.

އެ ކަން ވީ ވެސް އެހެންނެވެ. އެ ތަނުގެ ނަންބަރަށް ގުޅައިލުމުން ވަރަށް ހިތްހެޔޮ މިޒާޖެއްގެ ބިދޭސީއަކު ސައިކަލެއްގައި އަހަރެންނަށް މަނިކު ސޭޓު ހަދިޔާކުރި "ސަޕްރައިޒް" ފޮށިގަނޑު ހިފައިގެން 30 މިނެޓު ތެރޭގައި އައެވެ.

މަންޝާ އޮންލައިންގައި ނެތް އެއްޗެއް ނެތެވެ. އެއީ ވެސް ތެދެކެވެ. އަހަރެންނަށް އެތަނަށް ވަދެވުމުން އިނގިރޭސި ބަހުން އެ ބުނާ "ސްޕޮއިލްޓް ފޮ ޗޮއިސް"ގެ "މައްސަލަ" ކުރިމަތިވިއެވެ. މާނައަކީ ބޭނުންވާ ކަހަލަ ބާވަތްތައް ގިނަކަމުން ނަގާނެ ނުނަގާނެ އެއްޗެއް ނޭނގުމެވެ.

"މަންޝާ އޮންލައިން"ގެ ވިޔަފާރި ތަފާތުވާ އެތައް ސަބަބުތަކެއް އެބަހުއްޓެވެ. ގިނަ ބަޔަކަށް އެންމެ ކަމުދާ އެއް ސަބަބަކީ ހުރިހާ ބާވަތެއްގެ މުދާ އެއް ފުރާޅެއްގެ ދަށުން ލިބުމުގެ އިތުރުން އެންމެ ފޯނު ކޯލަކުން އެ ގެއަކަށް، އެ ރަށަކަށް ނުވަތަ އެ ރިސޯޓަކަށް ވެސް ތަކެތި ފޮނުވައިދޭ ކަމެވެ.

"އަޅުގަނޑުމެންގެ އަމާޒަކީ ހުރިހައި ބާވަތެއްގެ މުދާ ހެޔޮ އަގުގައި ފޯރުކޮށްދިނުން. މުދާ ޑެލިވެރީ މާލެ، ހުޅުމާލެ އަދި ބޯޓުފަހަރަށާއި އަދި ބޭނުންވެއްޖެ ނަމަ އެއަރފްރައިޓްކޮށް ވެސް ރާއްޖޭގެ ހުރިހައި ރަށަކަށް ފޮނުވައިދޭނެ. އޯޑަރު ދޭތާ އެއް ގަޑިއިރު ތެރޭގައި ސާމާނު ޑެލިވަރކޮށްދޭނެ. އަމާޒަކީ މާލޭ އޭރިޔާ އާއި ބޯޓުފަހަރަށް ގިނަވަގެން 20 ނުވަތަ 40 މިނިޓް ތެރޭގައި ޑެލިވަރކޮށްދިނުން،" މަނިކު ސޭޓު ބުންޏެވެ.

ފިހާރަތެރެ ދައްކާލަމުން މަނިކު ސޭޓު އިތުރަށް ބުންޏެވެ.

"މި ތަނުގައި ދިވެހިވަންތަ ސްވެނިއަރ ހުންނާނެ. މަގާއި މުންޑާއި ޓީޝާޓް ހުންނާނެ. ކުޑަކުދީންނަށް ބޭނުންވާނެ ހުރިހައި ސާމާނެއް ހުންނާނެ. ރީތިވާ ސާމާނު ހުންނާނެ. ސެންޓު، ލޯޝަން، ބޮޑީ ސްޕްރޭ، ޝޭމްޕޫ ހުންނާނެ. ޖާޒީ އާއި ޓީޝާޓާއި ސޯޓާއި ޒުވާނުން ކުޅިވަރު ކުޅޭ ހުރިހައި ސާމާނެއް ހުންނާނެ. މެޓާ، ޗޮކްލެޓް ހުންނާނެ. އަވިއައިނާއި ގަޑި ހުންނާނެ. އެކި ކަހަލަ ނަޓްސް ހުންނާނެ. ހެލްމެޓާއި އިސްތިރި އާއި ބެޑްޝީޓާއި ކުއިލްޓާއި ގެއާއި ބަދިގެތެރޭގެ އެކި ކަންކަމަށް ބޭނުން ހުރިހައި އެއްޗެއް ހުންނާނެ. ގޮދަޑި ހުންނާނެ. އެކި ސައިޒުގެ ފޮއްޓާއި ދަބަހާއި ތޮތްޕާއި ބެކްޕެކް ހުންނާނެ. މުސައްލަ ހުންނާނެ. އެކި ކަހަލަ ހާޑްވެއާރ ވެސް ހުންނާނެ. ރައްޓެހިންނަށް ދޭނެ އެކި ކަހަލަ ހަދިޔާ ވެސް ހުންނާނެ."

މަންޝާ އޮންލައިން އިން ފާހަގަވީ އަނެއް ކަމަކީ އެ ފިހާރަ ތެރޭގައި އަބަދުވެސް ކަސްޓަމަރުން އުޅޭ ކަމެވެ. ދަތުރުވަރުގައި އައިސް އުޅޭ ބިދޭސީންނާއި ރިސޯޓްތަކުން އައިސް އުޅޭ ކުދީންވެސް މެއެވެ. ޝައުގުވެރިކަމާއެކު ސާމާނު ބަލައި، ބާސްކެޓަށް އަޅަމުންދިޔައެވެ.

މަންޝާ އޮންލައިން ފިހާރައަށް ދެވޭ ގޮތް ނުވިޔަސް އެ ތަނުން ހިދުމަތް ހޯދުމަށް، 7772341 ނުވަތަ 7991551 އަށް ގުޅައިލުމުން ނުވަތަ ވައިބަރ/ ވަޓްސްއަޕް މެސެޖެއް ކޮށްލިޔަސް ހުރިހައި ކަމެއް ހަމަޖެހޭނެ ކަމަށް މަނިކު ސޭޓު ބުންޏެވެ. މި ކަން ވެސް މަނިކު ސޭޓު ހަމަ އެ ބުނި ގޮތަށް އަހަރެންނަށް އުފަލާއެކު ތަޖުރިބާކުރެވުނެވެ.

މަންޝާ އޮންލައިނަކީ ހަގީގަތުގައި ވެސް "ވެލިއު ފޮ މަނީ" ނުވަތަ މުދަލުގެ އަގު އެ މީހަކު ހިތްހަމަޖެހޭނެ ގޮތަށް ލިބޭ ސުޕަމާކެޓެކެވެ. ފިހާރައިގެ އެތެރެ ކިޔުންތެރިންނަށް ދައްކައިލުމަށް ފޮޓޯކޮޅެއް ނެގީމެވެ.