ސޫމާލިޔާގެ އެއްވެސް ސަރަހައްދެއްގައި އިސްރާއީލުގެ އަސްކަރީ ބާރެއް އޮތަނުދޭނެކަމަށް ރައީސް ހަސަން ޝައިހް މުހައްމަދު ވިދާޅުވެއްޖެއެވެ.
އެއްވެސް ހާލަތެއްގައި އިސްރާއީލުގެ އަސްކަރީ ހަރަކާތެއް ސޫމާލިޔާގެ ބިމެއްގައި އޮތުމަކީ ގަބޫލުނުކުރައްވާނެ ކަމެއްކަމަށް މުހައްމަދު (ފޮޓޯ) އިއްޔެ ވިދާޅުވިއެވެ.
"އިސްރާއީލުގެ ހަރަކާތްތަކުން އަހަރެމެންގެ ގައުމަށް ކުރިމަތިވެފައިވާ ގޮންޖެހުންތައް ނައްތައިލައިނަން،" އޭނާ ވިދާޅުވިއެވެ.
މުހައްމަދު ވިދާޅުވީ އިސްރާއީލުން މަސައްކަތްކުރަނީ ސޫމާލިޔާއިން ވަކިވެގަނެގެން އުޅޭ، މިނިވަން ދައުލަތެއްގެ ގޮތުގައި ހަމައެކަނި އިސްރާއީލުން ބަލައިގަންފައިވާ ސޫމާލިލޭންޑްގައި އަސްކަރީ މަރުކަޒެއް ގާއިމުކުރަންކަމަށެވެ. އަދި ސޫމާލިލޭންޑްގެ އެއާޕޯޓްވެސް އިސްރާއީލުން ބޭނުންކުރަން މަސައްކަތްކުރާކަމަށް މުހައްމަދު ވިދާޅުވިއެވެ.
އޭނާ ވިދާޅުވީ މެދުއިރުމަތީގެ މައްސަލަތަކަށް ސޫމާލިޔާއިން ނުވަންނާނެކަމަށެވެ. އެއީ އިސްރާއީލުން މެދުއިރުމަތީގެ މައްސަލަތަކަށް ސޫމާލިޔާ ވައްދަން މަސައްކަތްކުރިނަމަވެސްމެއެވެ.
ސޫމާލިލޭންޑް ސޫމާލިޔާގެ ކިބައިން 1991 ގައި މިނިވަންކަން އިއުލާންކުރިޔަސް އިސްރާއީލު ފިޔަވައި އދ.ގެ އެހެން އެއްވެސް ގައުމަކުން މި ވީ ތިން ދަހަރުގައި ސޫމާލިލޭންޑް ބަލައިގަންފައެއްނުވެއެވެ.
advertisment
