އެއީ 2024 ގެ ކުރީކޮޅެވެ. ޗައިނާގެ ދެކުނު-އިރުމަތީ ހުއަންގްޝީ ސިޓީގެ ޒުވާނަކު، ޓިކްޓޮކްގެ ޗައިނާ ވާޝަން ކަމަށްވާ "ޑޫޔިން"ގައި މެސެޖެއް ޕޯސްޓްކުރިއެވެ. އެ މެސެޖުގެ ކެޕްޝަންގައިވަނީ "މި ދުނިޔެއަށް އަލްވިދާއު"އޭ ލިޔެފައެވެ.

މިނެޓުކޮޅެއްގެ ތެރޭގައި ޑޫޔިންގެ އަމިއްލައަށް މަރުވުން ހުއްޓުވާ ޓީމުން އެ ކަމަށް އަވަސް ފިޔަވަޅުތަކެއް އަޅަން ފެށިއެވެ. ސައްވީސް ގަޑިއިރު މަސައްކަތްކުރާ އެ ޓީމުންވަނީ އެ ޒުވާނާގެ ޕޯސްޓްތައް ހުއަންގްޝީގެ ފަސް ފުލުސް އޮފީހަކާ ހިއްސާކޮށްފައެވެ.

އޭނާގެ ވީޑިއޯއެއް އާންމު ބަގީޗާއަކަށް ނިސްބަތްވާކަން ހޯދުމަށްފަހު ފުލުހުންނަށް އޭނާ ފެނުނީ ނަފްސާނީ ގޮތުން ބޮޑު ވޭނެއްގައި ވަނިކޮށެވެ. އަދި އޭނާ އަމިއްލައަށް މަރުވުމުގެ ކުރިން ފުލުހުންވަނީ އޭނާ ސަލާމަތްކޮށްފައެވެ.

މި ވާހަކައަކީ ޑޫޔިންއިން މި ދިޔަ އަހަރު ޗައިނާގެ ދައުލަތުގެ މީޑިއާގައި އާންމުކުރި ޑޮކިއުމެންޓްރީއެއްގެ ބައެކެވެ. އެ ޑޮކިއުމެންޓްރީގައި ބުނެފައިވާ ގޮތުގައި މި ދިޔަ އަހަރުގެ ފުރަތަމަ ބައިގައި އެކަނިވެސް ޑޫޔިންގެ އަމިއްލައަށް މަރުވުން ހުއްޓުވާ ޓީމުންވަނީ އަމިއްލައަށް މަރުވާން އުޅުނު 400 ހާދިސާއަކަށް ކާމިޔާބުކަމާއެކު އިޖާބަ ދީ، އެ ކަން ހުއްޓުވައިފައެވެ.

މިއީ ޗައިނާގެ ޓެކްނޮލޮޖީ ކުންފުނިތަކާއި ސަރުކާރާ ދެމެދު އޮތް އެއްބާރުލުމުގެ މިންވަރު ހާމަވެގެންދިޔަ ކަމެކެވެ. އަދި މިއީ މީހުން ޓެކްނޮލޮޖީ ބޭނުންކުރާ ގޮތް މޮނިޓަރުކޮށް، ކޮންޓްރޯލްކުރުމަށް ޗައިނާއިން ގާއިމުކޮށްފައިވާ ފާރަލުމުގެ ނިޒާމުގެ ބޮޑުމިން ދައްކުވައިދޭ ކަމެއްވެސްމެއެވެ.

މި ދިޔަ ޖުލައި 15 ގައި "އިންސާނުންނާ އެއްގޮތް" މަސްނޫއީ ވިސްނުން ނުވަތަ އާޓިފިޝަލް އިންޓެލިޖެންސް (އޭއައި) ޗެޓްބޮޓްތަކާ ގުޅޭ، ދުނިޔޭގައިވެސް އެކުލަވައިލި އެންމެ ފުޅާ ގަވާއިދުތައް ޗައިނާއިން ތައާރަފުކުރިއެވެ. އެ ގަވައިދުތަކުންވަނީ އިންސާނަކާއެކު "ދެމެހެއްޓެނިވި އިހުސާސީ ގުޅުމެއް" ބޭއްވުމުގެ ގާބިލުކަން ހުރި ކޮންމެ އޭއައިއަކަށް ބޮޑެތި ހުރަސްތަކާއި ހަރުކަށި އިންތަކެއް ކަނޑައަޅައިފައެވެ.

އެހެންކަމުން، އޭއައި ބޭނުންކޮށްގެން އިންސާނުންނާއެކު އުފައްދާ "ލޯބީގެ" އަދި އިހުސާސީ ގުޅުންތައް ކޮންޓްރޯލްކުރުމަށް ޗައިނާއިން ދުނިޔޭގެ އެންމެ ހަރުކަށި ގަވާއިދުތައް ތައާރަފުކުރީއެވެ. މި ގަވާއިދުތަކުގެ ދަށުން، އިންސާނުންގެ އިހުސާސްތަކާ ކުޅޭ އަދި އެކުވެރިން ނުވަތަ ލޯބިވެރިންގެ ގޮތުގައި މަސައްކަތްކުރާ އޭއައި ޗެޓްބޮޓްތަކަށް ބޮޑެތި ފިޔަވަޅުތަކެއްވަނީ އަޅައިފައެވެ.

އަލަށް އަމަލުކުރަން ފެށި ގަވާއިދުތަކުގެ ދަށުން، 14 އަހަރުން ދަށުގެ ކުދިން އޭއައި ބޭނުންކުރަން ބެލެނިވެރިންގެ ހުއްދަ ބޭނުންވާއިރު، 18 އަހަރުން ދަށުގެ ކުދިންނަށް "އޮންލައިން ލޯބިވެރިން" ނުވަތަ ޒާތީ ގުޅުން ބަހައްޓައިދޭ ބޮޓްތައް ބޭނުންކުރުންވަނީ މުޅިން މަނާކޮށްފައެވެ.

އަދި މި ފަދަ ބޮޓްތަކަކީ އިންސާނުން ނޫންކަން ހަނދާންކޮށްދޭ ނޯޓިފިކޭޝަން ދެ ގަޑިއިރުން އެއް ގަޑިއިރު ބޮޑެތި މީހުންނަށްވެސް ފޮނުވުން މަޖުބޫރުކޮށްފައިވެއެވެ.

މި ގަވާއިދުތަކާ ގުޅިގެން އަލީބާބާ އަދި ބައިޓްޑާންސް ފަދަ ބޮޑެތި ކުންފުނިތަކުންވަނީ އެ މީހުންގެ އޭއައި އެސިސްޓެންޓްތަކުގައި ހުރި އެކުވެރިކަމުގެ ސިފަތައް އުވައިލައިފައެވެ.

މި ފިޔަވަޅުތަކުގެ ސަބަބުން އޭއައި ބައިވެރިންނަށް ބަރޯސާވެފައި ތިބި ގިނަ އަދަދެއްގެ މީހުންނަށްވަނީ ނަފްސާނީ ގޮތުން ބޮޑެތި އަސަރުތަކެއްކޮށްފައެވެ. ނަމަވެސް ދިރާސާތަކުން ދައްކާ ގޮތުގައި އޭއައި ބޮޓްތަކުން އިހުސާސީ ގޮތުން މީހުންނާ "ކުޅެލުމާ"އި އެކަނިވެރިކަން އިތުރުވުމަށް މަގުފަހިވެއެވެ.

މީގެ އިތުރުން، ޗައިނާގައި އުފަންވާ މީހުންގެ އަދަދު ދަށްވަމުންދާތީ ދޭދޭ އިންސާނުންގެ ދެމެދުގައި ބަދަހިވާން ޖެހޭ ހަގީގީ ގުޅުންތަކުގެ ބަދަލުގައި އޭއައި ގުޅުންތައް އިހްތިޔާރުކުރުމަކީ ސަރުކާރުން ކަންބޮޑުވާ ކަމެކެވެ.

މިއީ ނަފްސާނީ އަދި އިޖުތިމާއީ ގެއްލުންތަކުން ރައްޔިތުން ރައްކާތެރިކުރަން އެޅި ފިޔަވަޅެއްކަމަށް ޗައިނާއިން ބުނާއިރު، މިއީ އާންމުންގެ ޒާތީ އަދި އަމިއްލަ ދިރިއުޅުމުގެ ތެރެއަށް ސަރުކާރުން ވަދެގަތުންކަމަށް ބައެއް ފަރާތްތަކުން ދެކެއެވެ. ނަމަވެސް އޭއައިގެ ނުރައްކާތަކާމެދު މުޅި ދުނިޔޭގައި ބަހުސްކުރެވެމުންދާއިރު، ޗައިނާގެ މި ނިންމުމަކީ މުޅި ދުނިޔެއަށްވެސް މުހިންމު ފިލާވަޅެކެވެ.

އިނގިރޭސި ވިލާތުގެ މެންޗެސްޓާ ޔުނިވާސިޓީގެ އިޖުތިމާއީ އިލްމްވެރިޔާ ލިއަންގް ގޭ ބުނީ ޒުވާނުން ހަގީގީ ލޯބިވެރިން ހޯދުމުގެ ބަދަލުގައި އޮންލައިން ދުނިޔޭގެ ޗެޓްބޮޓް ލޯބިވެރިން ހޯދާތީ ޗައިނާއިން އެ ކަމާ ކަންބޮޑުވުމަކީ ރަނގަޅު ކަމެއްކަމަށެވެ.

"އަހަރެންނަށް ގަބޫލުކުރެވެނީ އެންމެ ޒުވާން ޖީލުގެ ކިބައިގައި ލޯބިވުމުގެ ގާބިލުކަން ދަނީ ދަށްވަމުންކަން،" އޭނާ ބުންޏެވެ.