ކީރިތި ރަސޫލާގެ މިސްކިތް މަސްޖިދުއްނަބަވީއަށް ކަރަންޓުގެ ހިދުމަތް ފޯރުކޮށްދޭ އިންޖީނުގެއަށް ޔަމަންގެ ހޫތީން ދިން ހަމަލާ އިސްލާމީ ދުނިޔޭގެ ރާބިތާއިން މިއަދު ކުށްވެރިކޮށްފިއެވެ.

މަދީނާގައި ހުންނަ ތައިބާ އިންޖީނުގެއަށް، އީރާނުން ވާގިވެރިވާ ހޫތީން އިއްޔެ ދިން ހަމަލާއަކީ "ދުނިޔޭގެ މުސްލިމުން ރުޅިއަރުވައިލަންކުރި ނުރައްކާތެރި ކަމެއް"ކަމަށް ސައޫދީ އަރަބިއްޔާގައި ހުންނަ އެ ޖަމިއްޔާއިން ބުންޏެވެ.

"މި ހަމަލާއަކީ ހޫތީން ހުއްޓުމެއްނެތި ދެމުންދާ ހަމަލާތަކުގެ ތެރެއިން ހަމަލާއެއް. އިސްލާމް ދީނުގެ އެންމެ މުގައްދަސް އެއް ބިމަށް ހިދުމަތްދޭ ތަނަކަށް އަމާޒުކޮށް ހަމަލާދިނުމަކީ މުޅި ދުނިޔޭގެ މުސްލިމުންގެ ޖަޒުބާތުތަކާ ކުޅެލުންފަދަ ނުރައްކާތެރި ރުޅިއަރުވައިލުމެއް،" ރާބިތާއިން ނެރުނު ބަޔާނެއްގައި ބުންޏެވެ.

އެ ޖަމިއްޔާގެ އަމީންއާއްމު މުހައްމަދު ބިން އަބްދުލްކަރީމް އަލްއީސާ ބުނީ އާއްމު އިންފްރާސްޓްރަކްޗަރާއި ދީނީ މުގައްދަސް ތަންތަނަށް ދޭ ހަމަލާތައް ކުށްވެރިކުރާކަމަށާއި އެއީ އިސްލާމީ ވެލިއުސްތަކާއި އިންސާނިއްޔަތުކަމުގެ އަސާސީ ހަމަތަކާ ހިލާފު ކަމެއްކަމަށެވެ.

ރާބިތާއިން ބުނީ އެ ޖަމިއްޔާ އޮތީ ސައުދީ އަރަބިއްޔާއާ އެކުގައިކަމަށާއި އާންމުންނާއި މުގައްދަސް ބިންތަކުގެ ރައްކާތެރިކަން ކަށަވަރުކުރުމަށް އެ ގައުމުން އަޅަމުންދާ ފިޔަވަޅުތަކަށް ތާއީދުކުރާކަމަށެވެ.