އިސްރާއީލުން ރާވައިގެން ގައްޒާގެ އާއްމުން މަރައިލައި ނިޒާމު ދައްކުވައިދޭ ތަހުގީގީ ޑޮކިއުމެންޓްރީއަށް އިތުރު އިނާމެއް ލިބިއްޖެއެވެ.

"ނާޒާ"ގެ ނަމުގައި އިސްރާއީލުގެ ފިލްމް ހަދާ މީހެއްކަމަށްވާ ޔޫވަލް އަވްރަހަމް އާއި އަންހެނެއްކަމަށްވާ ރަކަލް ޝޯ ހެދި ޑޮކިއުމެންޓްރީއަށް އެންމެ ފަހުން ލިބުނީ މި ދިޔަ އާދީއްތަ ދުވަހު ސްޕެއިންގެ ސަން ސެބަސްޓިއަން ފިލްމް ފެސްޓިވަލްގެ އެންމެ މޮޅު ޔޫރަޕްގެ ފިލްމަކަށް އާއްމުން ދިން އެވޯޑެވެ.

މި ދިޔަ މަހު އިޓަލީގެ ބައިނަލްއަގުވާމީ ވެނިސް އިންޓަނޭޝަނަލް ފިލްމް ފެސްޓިވަލްގައިވެސް ހަތަރު އެވޯޑެއް އެ ޑޮކިއުމެންޓްރީއަށް ލިބުނެއެވެ. އޭގެ ތެރޭގައި އެ ފެސްޓިވަލްގެ ފަނޑިޔާރުން ދިން ހާއްސަ އެވޯޑު ހިމެނެއެވެ.

އިސްރާއީލުގެ 24 ސިފައިންނާއި އިންޓެލިޖެންސް މުވައްޒަފުންނާ ސިއްރުންކޮށްފައިވާ އިންޓަވިޔުތަކެއް މައްޗަށް ބިނާކޮށް ތައްޔާރުކޮށްފައިވާ ޑޮކިއުމެންޓްރީގެ ސަބަބުން އަވްރަހަމާއި ޝޯއަށް އިސްރާއީލު ސަރުކާރުގެ ނުރުހުމާއި ޕްރެޝަރުވަނީ ވަރަށް ބޮޑަށް އަމާޒުވެފައެވެ.

އިސްރާއީލުގެ ސަގާފަތާ ބެހޭ ވަޒީރު މީކީ ޒޮހަރުވަނީ އެ ދެ މީހުންގެ ރައްޔިތުކަން ނިގުޅައިގަންނަން ގޮވައިލައިފައެވެ. އަދި ބޮޑުވަޒީރު ބެންޖަމިން ނަތަންޔާހޫވަނީ، އިސްރާއީލު ސިފައިންގެ އަގުވައްޓައިލައިކަމަށް ތުހުމަތުކުރެވޭ މީހުންގެ ރައްޔިތުކަން ނިގުޅައިގަނެވޭނެ ގާނޫނެއް ހުށަހަޅައިނެކަމަށް ބުނެފައެވެ.

ޑޮކިއުމެންޓްރީއާ ދެކޮޅަށް ޝޯގެ މައިންބަފައިންގެ ގޭގެ ދޮށުގައި ޔަހޫދީންވަނީ މުޒާހަރާވެސްކޮށްފައެވެ.

"އަހަރެމެން މި ޑޮކިއުމެންޓްރީ ހެދީ މިއީ ސުލޫކީ ގޮތުން ކުރަން ޖެހޭ ކަމެއްކަމަށް އިހްސާސްކުރެވިގެން،" އަވްރަހަމް ބުންޏެވެ.

"އަހަރެމެންގެ ގައުމު (އިސްރާއީލު)އިން ދަނީ (ގައްޒާގެ އާއްމުން މަރައިލައި) މި ނިޒާމުތައް ސިއްރުކުރަން ވަރަށްވެސް ބޮޑަށް މަސައްކަތްކުރަމުން،" ޝޯ ބުންޏެވެ.

"ނާޒާ"އަކީ އެމެރިކާގައި ފިލްމަށް ދޭ އެންމެ ޝަރަފުވެރި އިނާމުކަމަށްވާ އޮސްކާ އެވޯޑު ލިބުނު ހުޅަނގު އައްސޭރިއާ ބެހޭ 2024 ގެ ޑޮކިއުމެންޓްރީ "ނޯ އަދާ ލޭންޑް"ވެސް ހެދި ޓީމުން ތައްޔާރުކުރި ޑޮކިއުމެންޓްރީއެކެވެ. "ނާޒާ" ޕްރޮޑިއުސްކުރީ އިނގިރޭސި ވިލާތުގެ ދަ ގާޑިއަން ނޫހާއި ޖޭމްސް ވިލްސަން (ޖޭ.ޑަބްލިޔު) ފިލްމްސްއިންނެވެ. އެގްޒެކެޓިވް ޕްރޮޑިއުސްކޮށްފައިވަނީ ޖޮނަތަން ގްލޭޒާއެވެ.

"ނާޒާ" މިއީ އެކްރަނިމެއް ނުވަތަ ލަފުޒުތަކެއް ފެށޭ އަކުރުތައް ބޭނުންކޮށްގެން އިސްރާއީލު ސިފައިން ހަދައިފައިވާ ލަފުޒެކެވެ. މި ލަފުޒު އިސްރާއީލުގެ އިންޓެލިޖެންސުން ބޭނުންކުރަނީ އިސްރާއީލުން ދޭ ކޮންމެ ވައިގެ ހަމަލާއެއްގައި ޝަހީދުވާނެކަމަށް ލަފާކުރެވޭ އާއްމުންގެ އަދަދަށް ރީތި ބަހުރުވައިން އިޝާރާތްކުރުމަށެވެ. މިއީ އިސްރާއީލުގެ އަސްކަރިއްޔާ އާއި އިންޓެލިޖެންސުން ސިއްރުކޮށްފައިވާ އެކްރަނިމެކެވެ.

ދެ އަހަރުވީ ގައްޒާ ހަނގުރާމަ ހުއްޓައިލަން މި ދިޔަ އަހަރުގެ އޮކްޓޫބަރުގައި އިސްރާއީލުން އެއްބަސްވިޔަސް ގައްޒާއަށް އަދިވެސް ދެމުންދާ ހަމަލާތަކުގައި މިހާތަނަށް 73،000 އަށްވުރެ ގިނަ މީހުން ޝަހީދުވެއްޖެއެވެ.