މީދާ ނޫޅޭކަމަށް މަޝްހޫރު ކެނެޑާގެ ޕްރޮވިންސަކުން މަރުވެފައިވާ މީދަލެއް ފެނުމުން މައްސަލައަކަށްވެއްޖެއެވެ.
އަލްބާޓާ ޕްރޮވިންސްގެ ބޯޑަން ޓައުނުން މި ދިޔަ ބުރާސްފަތި ދުވަހު ފެނުނީ ފޫޓެއްހާ ދިގުމިނުގެ "ނޯވޭ" ބާވަތުގެ މީދަލެކެވެ.
މި ކަމުގެ ސަބަބުން، 1950 ގެ އަހަރުތަކުން ފެށިގެން މީދާ ކޮންޓްރޯލްކުރުމުގެ ޕްރޮގްރާމެއް ހިންގާ އަލްބާޓާއަކީ މީދާ ނެތް ތަނެއްކަމުގެ ރީތި ނަން ގެއްލިއްޖެކަމަށް އޮފިޝަލުން ބުންޏެވެ.
އެ މީދަލުގެ ހަށިގަނޑު ނައްތައިލައި، އަދި އެ މީދާ އަލްބާޓާއިން ފެނުނީ ކީއްވެތޯ ބަލަން ތަހުގީގެއް ހިންގަން މީދާ ކޮންޓްރޯލްކުރާ މަސައްކަތުގައި ހަރަކާތްތެރިވާ މުވައްޒަފުން ފޮނުވިކަމަށް އޮފިޝަލުން ބުންޏެވެ.
"މީދާގެ ނަޖިސް ނުވަތަ އެހެންވެސް ނިޝާނެއް ފެނިއްޖެނަމަ، ރަސްމީ އިދާރާ، ރެޓް ޕެޓްރޯލް އަލްބާޓާއަށް އެންގުން އެދެން. އެއީ އެއިރުން އެ މައްސަލައެއް ބަލަން،" ބޯޑަން ޓައުނުން ނެރުނު ބަޔާނެއްގައި ބުންޏެވެ.
އަލްބާޓާ ޕްރޮވިންސްގެ ސަރުކާރުން ބުނީ އަލްބާޓާއަކީ މީދާ ނެތް ޕްރޮވިންސެއްކަމަށް ބުންޏަސް އޭގެ މާނައަކީ މީދަލެއް ދުވަހަކުވެސް އެ ޕްރޮވިންސަށް ނުވަންނަ ވާހަކަ ނޫންކަމަށެވެ. ނަމަވެސް އޭގެ މާނައަކީ މީދާ ވިހާނެ މިންވަރަށް ޖޯޑުތައް އިތުރުނުވާނެ ގޮތަށް އަލްބާޓާއިން މީދާ ކޮންޓްރޯލްކުރާ ވާހަކަކަމަށެވެ.
advertisment
