އިސްލާމީ ތަރިކަ ޙިމާޔަތް ކުރުމަކީ މުޅި އިސްލާމީ އުންމަތުގެ ވާޖިބެއް ކަމުގައި ދީނީ އިލްމުވެރިޔާ އަދި ކުރީގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމު ވިދާޅުވެއްޖެއެވެ.
ދުނިޔޭގައި މިއަދު ފާހަގަކުރަމުންދާ "އިސްލާމީ ދުނިޔޭގައި ތަރިކައިގެ ދުވަހާ" ގުޅުވައިގެން ކުރެއްވި ޓްވީޓެއްގައި ރައީސް މައުމޫން ވިދާޅުވީ "އިސްލާމީ ތަރިކައަކީ ޢިލްމުތަކާއި އަދަބިއްޔާތާއި ތަފާތު ސަޤާފީ ކަންތައްތަކާއި ފަންނުތައް ހިމެނޭ ވަރަށް މުއްސަނދި ތަރިކައެއް" ކަމަށާއި "މިތަރިކަ ދަމަހައްޓައި ޙިމާޔަތް ކުރުމަކީ މިއަދު އެކަނި ކުރަންވީ ކަމެއް ނޫން" ކަމަށެވެ.
"އެއީ އަބަދަށްޓަކާ މުޅި އިސްލާމީ އުންމަތުގެ ވާޖިބެއް،" ރައީސް މައުމޫން ވިދާޅުވިއެވެ.
އިސްލާމީ ތަރިކައަކީ ޢިލްމުތަކާއި އަދަބިއްޔާތާއިތަފާތު ސަޤާފީ ކަންތައްތަކާއި ފަންނުތައްހިމެނޭ ވަރަށް މުއްސަނދި ތަރިކައެއް . މިތަރިކަ ދަމަހައްޓައި ޙިމާޔަތް ކުރުމަކީ މިއަދުއެކަނިކުރަންވީކަމެއް ނޫން. އެއީއަބަދަށްޓަކާމުޅިއިސްލާމީ އުންމަތުގެ ވާޖިބެއް. #އިސްލާމީތަރިކައިގެދުވަސް
— Maumoon Abdul Gayoom (@maumoonagayoom) September 25, 2020
ދިވެހިރާއްޖެ އިސްލާމްވީ، ހިޖުރައިން 548 ވަނަ އަހަރު ރަބީޢުލްއާޚިރު މަހުގެ ތެރޭގައެވެ. ވޭތުވެދިޔަ 893 އަހަރަށް ބަލާއިރު، ރާއްޖޭގައި ހުރި، ޒަމާންވީ އިސްލާމީ އާސާރީ ތަރިކަތަކުގެ ތެރޭގަައި ޒަމާންވީ ތާރީޚީ އާސާރީ މިސްކިތްތައް ފާހަގަކުރެވެއެވެ. މާލޭގެ ނުވަތަ ރާއްޖޭގެ އެންމެ ފުރަތަމަ މިސްކިތް ކަމުގައިވާ ދަރުމަވަންތަ ރަސްގެފާނު މިސްކިތް ބިނާ ކުރެވުނީ މީގެ 890 އަހަރު ކުރިންނެވެ.
މީގެ އިތުރުން، މީގެ 400 އަހަރު ކުރިން ބިނާ ކުރެވުނު މާލޭ ހުކުރު މިސްކިތާއި، އެ މިސްކިތުގެ މުންނާރަކީ ރާއްޖޭގެ އިސްލާމީ އާސާރީ ތަރިކަތަކުގެ ތެރެއިން ޚާއްޞަ ގޮތެއްގައި ފާހަގަކުރެވޭ އާސާރުތަކެކެވެ.