އިންޑިއާގެ މިލިޓަރީގެ ނުފޫޒު ރާއްޖޭގައި ގަދަވާ ވާހަކަ އިދިކޮޅު ފަރާތްތަކުން ދައްކަމުންދަނިކޮށް އިންޑިއާ ސިފައިންގެ ދެ ޑޯނިއާ ފްލައިޓް ހދ. ހަނިމާދުއަށް މިއަދު ހެނދުނު ޖައްސައިފިއެވެ. ނަމަވެސް އެމްއެންޑީއެފްގެ މީޑިއާ އޮފިޝަލް މޭޖަރ އިބްރާހިމް އާޒިމް ވިދާޅުވީ މި ދެ ފްލައިޓަކީ ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދު (އީއީޒެޑް) ގައި އިންޑިއާ ސިފައިންނާއި އެމްއެންޑީއެފުން ގުޅިގެން ކުރިއަށްގެންދާ ސާވިއަލަންސް ޕެޓްރޯލިންގައި ބައިވެރިވުމަށް އައި ދެ ފްލައިޓު ކަމަށެވެ.

އާޒިމް ވިދާޅުވީ މި ދެ ފްލައިޓް ހަނިމާދޫއަށް އައިސްފައި ވަނީ މިއަދު ހެނދުނު 10:30 ގައި ކަމަށާއި މިމަހުގެ 16 ގެ ނިޔަލަށް އެތަނުން އެއް ފްލައިޓް ހަނިމާދޫގައި އޮންނާނެ ކަމަށެވެ. މި އޮޕަރޭޝަންގައި ބައިވެރިވާނީ އެތަނުން އެއް  ފްލައިޓް ކަމަށާއި ދެވަނަ ފްލައިޓް މިއަދުގެ ވަގުތެއްގައި އަނބުރާ ފުރާނެ ކަމަށް ވެސް އޮފިޝަލް ވިދާޅުވި އެވެ.

"އާއްމުކޮށް އޮޕަރޭޝަނަށް ދެ ފްލައިޓް އަންނާނީ. އެއީ ބެކަޕް ފްލައިޓަކާއި އޮޕަރޭޝަންގައި ބައިވެރިވާ ފްލައިޓެއް. ބެކަޕް ފްލައިޓް އަންނަ ދުވަހު ފުރާނެ. އެގޮތުން ބެކަޕް ފްލައިޓް މިއަދު ފުރާނެ. އޮޕަރޭޝަންގައި ބައިވެރިވާނީ އެންމެ ފްލައިޓެއް،" އެމްއެންޑީއެފުން ބުންޏެވެ.

MNDF Coast Guard and Indian Navy will assume a continuation of the joint aerial surveillance patrol of the Maldives Exclusive Economic Zone today. This is a series of continued joint maritime enforcement operations undertaken by the two maritime forces since 2009. pic.twitter.com/7au6ft01Eu

— Maldives National Defence Force (@MNDF_Official) September 8, 2020

އާޒިމް ވިދާޅުވީ 2009 ވަނަ އަހަރުން ފެށިގެން އެމްއެންޑީއެފްގެ ކޯސްޓްގާޑާއި އިންޑިއާގެ ސިފައިންނާ ގުޅިގެން ސިލްސިލާކޮށް ކުރިއަށްގެންދާ މިއީ 54 ވަނަ ސާވިއެލަންސް ޕެޓްރޯލިންގް ކަމަށާއި މި ސާވިއެލަންސް ޕެޓްރޯލް ކުރުމުގައި ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދުގައި ގާނޫނާ ހިލާފަށް ކަނޑުމަތީގެ އެއްވެސް ކަމެއް ހިނގާތޯ ބަލަމުން ގެންދާނެ ކަމަށެވެ.

އިންޑިއާގެ ޑޯނިއާ ދެ ފްލައިޓް ހަނިމާދޫއަށް އައިސްފައި މިވަނީ އިންޑިއާ ސިފައިން ރާއްޖޭގައި ތިބުމާ ދެކޮޅަށް އިދިކޮޅު ސިޔާސީ ފަރާތްތަކުން އަޑު އުފުލަމުން ދަނިކޮށެވެ. މިހާރު ވެސް އިންޑިއާގެ ސިފައިން ދަނީ ރާއްޖޭގައި ދެ ހެލިކޮޕްޓަރެއް އޮޕަރޭޓް ކުރަމުންނެވެ.

އިންޑިއާގެ ސިފައިން ރާއްޖޭގައި ތިބޭތީ އެކަމާ އިދިކޮޅުން ކަނބޮޑުވުން ފާޅުކުރަމުން ގެންދަނިކޮށް އެމްއެންޑީއެފުން ވަނީ އެކަމާ ބެހޭ ގޮތުން ރައްޔިތުންނަށް ހަގީގަތް ހާމަކޮށްދީފައެވެ. އެގޮތުން ހަތިޔާރު އެޅި ސިފައިންގެ ފައުޖެއް ނުވަތަ ބަޔަކު ރާއްޖޭގައި ނެތް ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވަނީ ވިދާޅުވެފަ އެވެ. ނަމަވެސް ހިއުމެނިޓޭރިއަން ރޯލެއްގައި އިންސާނީ ހިދުމަތްތަކެއް ދިނުމަށް ޓެކްނީޝަނުންގެ އެހީތެރިކަން އަބަދުވެސް ލިބެމުން އަންނަ ކަމަށް ޝަމާލް ވަނީ ވިދާޅުވެފަ އެވެ.

އެމްއެމްޑީއެފުން އެހެން ބުނުމާއެކު "އަދިވެސް" އަށް ދެއްވި އިންޓަވިއުއެއްގައި ކުރީގެ ހޯމް މިނިސްޓަރު އުމަރު ނަސީރު ވިދާޅުވީ ރާއްޖޭގައި ތިބޭ އިންޑިއާ ސިފައިންގެ އަތުގައި މިވަގުތު ހަތިޔާރު ނެތުން އެއީ ނުރައްކާ ކުޑަވާ ކަމެއް ނޫން ކަމަށާއި ހެލިކޮޕްޓަރުގައި ގޮސް އިންޑިއާ މަނަވަރަކުން ހަތިޔާރު ގެނެސް، ރާއްޖޭގައި މިތިބަ 150 އިންޑިއާ ސިފައިން ހަތިޔާރު އެޅި ފައުޖަކަށް ބަދަލުވުމަށް ބޭނުންވާނީ އެންމެ ދެ ގަޑިއިރު ކަމަށެވެ.