ކާށިތެލަކީ ޒަމާނުއްސުރެ ރާއްޖޭގައި ހާނައި، ބަންދުކޮށްގެން އެކިއެކި ބޭނުންތައް ކުރަމުން އަންނަ އެއްޗެކެވެ. އަދި މިއީ ހަމަށާއި އިސްތަށިގަނޑުގައި ބޭނުން ކުރާނަމަ އަބަދުވެސް ގިނަ މީހުންގެ "ނަމްބަރު ވަން ޗޮއިސް" އެވެ. ވަކިން ހާއްސަކޮށް ކާށިތެލަކީ ޓޫރިސްޓުން މާ ގަޔާވާ އެއްޗެކެވެ. އެހެންކަމުން ކ. ހިންމަފުށީ، ފަރުހާދު އިބްރާހިމް (ފަރޭ) ބޭނުންވީ ޓޫރިޒަމް ދާއިރާއަށް ޓާގެޓްކޮށް، ވީހާ ވެސް ފުޅާ ދާއިރާއެއްގައި ކާށިތެޔޮ ބަންދުކޮށް، ފޯރުކޮށްދޭށެވެ. އެގޮތުން ފަރޭ މިވަނީ އޭނާގެ އަމިއްލަ ބްރޭންޑެއް ކަމުގައިވާ "ޑޮލްފިން ބްރޭންޑް"ގެ ކާށިތެޔޮ ރާއްޖޭގެ ބާޒާރަށް ނެރެދީފަ އެވެ.

"ޓޫރިސްޓް ފިހާރަތަކަށް "ޑޮލްފިން ބްރޭންޑް"ގެ ކާށިތެލުގެ ޑިމާންޑު ވަރަށް ބޮޑު،" ފަރޭ ބުންޏެވެ.

ފަރޭ ނެރެފައި ވަނީ "ޑޮލްފިން ބްރޭންޑް"ގެ ތިން ސައިޒެއްގެ ފުޅިއެވެ. އެއީ 60 އެމް.އެލް، 100 އެމް.އެލް އަދި 120 އެމް.އެލް އެވެ. އަގުތައް އުޅެނީ 65ރ.، 75ރ. އަދި 85ރ. ގައެވެ.

ފަރޭ ބުނި ގޮތުގައި ޑިމާންޑާ އެއްވަރަށް އެއްފަހަރާ ހުރިހާ ތަނަކަށް ފޯރުކޮށްދެވޭ ވަރަށް ވުރެ ރާއްޖެއިން ކާށިތެޔޮ ލިބޭލެއް މަދެވެ. އަދި އެހާ ގިނައިން ގަންނައިރު ލިބޭ އަގުވެސް ބޮޑު ކަމަށެވެ. އެހެންކަމުން ފަރޭ މިހާރު ތެޔޮ ގެންނަނީ ލަންކާއިންނެވެ. ތެޔޮ ގަތުމުގައި ވެސް ފަރޭ އެންމެ އިސްކަމެއް ދެނީ އިތުރު އެއްޗަކާ އެއްނުކޮށް ހުންނަ ސައްތައިން ސައްތަ ކޮކޮނަޓް އޮއިލް ގެނައުމަށެވެ.

"ޑޮލްފިން ބްރޭންޑް"ގެ ކާށިތެޔޮ ފުޅީގައި ހުންނަނީ ރާއްޖޭގެ ދިދަ ޖަހައި ދިވެހިވަންތަކަން ދައްކުވައިދޭ މަންޒަރު ކުރަހައިފައެވެ.

"މި ސަރަހައްދުން އެންމެ ރަނގަޅު ކާށިތޮޔޮ، ހެޔޮ އަގުގައި ލިބެނީ ސްރީލަންކާއިން. އެހެންވެ ލަންކާ އިން ތެޔޮ ގެންނަނީ ބެރެލްގައި ބަންދުކޮށްގެން. ގެނެސް ރާއްޖޭގައި އެ ޕެކްކުރަނީ އަޅުގަނޑު އަމިއްލައަށް،" ފަރޭ ބުންޏެވެ.

ކާށިތެޔޮ ޕެކްކުރުމުގެ މަސައްކަތް ފަރޭ ކުރަނީ ހިންމަފުށީގައި ގެސްޓުން އުޅޭ ބީޗް ސަރަހައްދުގެ ހަޓެއްގައި އިނދެގެންނެވެ. އެއީ ގެސްޓުންގެ ސަމާލުކަން ހޯދުމަށް ގެންގުޅޭ އުކުޅެކެވެ. އެގޮތުން ވެސް ގިނަ ބައެއްގެ ސަމާލުކަން "ޑޮލްފިން ބްރޭންޑް"ގެ ކާށިތެލަށް އަންނަނީ ލިބެމުންނެވެ.

ފަރޭގެ "ޑޮލްފިން ބްރޭންޑް" ވުޖޫދުވެގެން އައިސްފައިވަނީ 1990 ވަނަ އަހަރު އޭނާ ހިންމަފުށީގައި ހުޅުވި ގެސްޓް ފިހާރައާ ހިސާބުންނެވެ. އެއަށްފަހު 2004 ގައި ޑޮލްފިން ކެފޭގެ ނަމުގައި ހިންމަފުށީގައި ފަރޭގެ ރެސްޓޯރެންޓެއް ހުޅުވި އެވެ. އޭރު އެތަނުގައި ބޭނުންކުރާ ތަށިތަކުގައި ވެސް ހުންނަނީ ޑޮލްފިން ލޯގާއާ އެކު ޖަހައިފަ އެވެ. އޭގެ ފަހުން 2011 ގައި ޑޮލްފިން ބްރޭންޑުގެ ރިހާކުރާއި ހަވާދުގެ ބާވަތްތައް ފަރޭ ބާޒާރަށް ނެރެން ފެށި އެވެ.

ފަރޭ ބުނިގޮތުގައި ޑޮލްފިން ބްރޭންޑްގެ ރިހާކުރާއި ހަވާދުގެ ބާވަތްތައް އުފެއްދުން ހުއްޓުނީ ކޮވިޑްގެ ލޮކްޑައުންނާ ގުޅިގެންނެވެ. ނަމަވެސް އެ މަސައްކަތް އަނެއްކާ ފެށުމަށް ފަރޭ އަންނަނީ ތައްޔާރުވަމުންނެވެ. ޑޮލްފިން ބްރޭންޑްގެ ރިހާކުރާއި ހަވާދު މިފަހަރު ފަރޭ ބާޒާރަށް ނެރޭނީ ރީބްރޭންޑް ކޮށްގެން ކަމަށް އޭނާ ބުންޏެވެ.

"ޑޮލްފިން ބްރޭންޑް" ކާށިތެލާ ބެހޭ އިތުރު މައުލޫމާތު ހޯދުމަށް ވައިބަރ/ ވަޓްސްއަޕް އިން ގުޅުމަށް:

9609944441+
9607744441+