ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އަށް އިންޑިއާއިން ޕޮޒިޓިވްވި މީހުންގެ އަދަދު ތިން މިލިއަނާއި ގާތަށް އަރައިފިއެވެ.

ފާއިތުވި 24 ގަޑިއިރުގެ ތެރޭގައި އެކަނިވެސް 68،898 މީހުން އަލަށް ޕޮޒިޓިވްވެ، އެ ގައުމުގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 2.98 މިލިއަނަށް އަރައިފައެވެ. އަދި ފާއިތުވި 24 ގަޑިއިރުގެ ތެރޭގައި 983 މީހުން މި ބަލީގައި މަރުވެފައިވާއިރު، ކޮވިޑް-19 ޖެހިގެން މަރުވި މީހުންގެ ޖުމްލަ އަދަދު 56،780 އަށް އަރައިފައިވާކަމަށް އެންމެ ފަހުގެ ތަފާސް ހިސާބުތަކުން ދައްކައެވެ.

ކޮވިޑް-19 އާއި ބެހޭ މައުލޫމާތު އާންމުކުރާ ބައިނަލްއަޤުވާމީ އިދާރާތަކުން ނެރެފައިވާ ތަފާސްހިސާބުތަކަށް ބަލާއިރު އިންޑިއާއަކީ މިހާރު ދުނިޔޭގައި ތިންވަނައަށް އެންމެ ގިނަ މީހުން ކޮވިޑް-19 އަށް ޕޮޒިޓިވްވެފައިވާ ގައުމެވެ. ފާއިތުވި ހަތަރު ދުވަހުގެ ތެރޭގައި އިންޑިއާގައި ދުވާލެއްގެ މައްޗަށް 60،000 މީހުން ޕޮޒިޓިވްވެފައިވާ ކަމަށް އެގައުމުގެ ހަބަރުފަތުރާ ވަސީލަތްތަކުން ބުނެއެވެ.

އިންޑިއާގައި ހަލުވިކަމާއެކު ކޮވިޑް-19 ފެތުރެމުންދާ މި ދަނޑިވަޅުގައި، އެ ގައުމުގެ ފަގީރު ހިސާބުތަކުގައި މި ބަލިން ރައްކާތެރިވުމަށް އަމަލުކުރަމުން އައި ގޮތްތައް ދޫކޮށްލައި، އެމީހުންގެ އާންމު ދިރިއުޅުމަށް ރުޖޫއަވެފައިވާތީ، އެ ގައުމުގެ ސިއްހީ މާހިރުން ވަނީ އެކަމާމެދު ކަންބޮޑުވުން ފާޅުކޮށްފައެވެ.