ދިވެހިރާއްޖޭގެ ކަނޑާއި އެއްގަމު ވެށީގައި ހިމެނޭ ދިރުންތަކުގެ ސިންދަފާތާ ގުޅޭ ފުރަތަމަ މަޖައްލާ މިއަދު ނެރެފިއެވެ.

ފުވައްމުލަކަށް އުފަން ލިޔުންތެރިޔާ ޔާސިރު ސާލިހުގެ އެޑިޓަރު ކަމުގައި ނެރޭ "މޯލްޑިވްސް މައި އައިލެންޑްސް" އަކީ ރާއްޖޭގެ ކަނޑުއަޑީގެ ރީތިކަމާއި، ކަނޑުތަކުގައިވާ މަސްމަހާއި މެއްސާއި، ރަށްތަކުގެ ވަށައިގެންވާ މާހައުލުގައި އުޅޭ ދޫނިސޫފާސުއްޕާއި، ރާއްޖޭގައި އެންމެ ކުރިންސުރެ ކުރަމުން އައި މަސްވެރިކަމާއި، މިހާރު މަސްވެރިކަން ކުރާ ގޮތާއި، ރާއްޖޭގެ ތާރީޚާއި ސަގާފަތާއި ފްލޯކް ވާހަކަތައް ހިމަނައިގެން އިނގިރޭސި ބަހުން ނެރޭ ފުރަތަމަ މަޖައްލާ އެވެ. "ޕެލާޖިކް ޑައިވާސް ފުވައްމުލައް" ޑައިވް ސެންޓަރުގައި މި މަޖައްލާ ނެރެދެއްވީ ޕެލަޖިކް ޑައިވާސްގެ މެނޭޖިން ޑައިރެކްޓަރު އަހުމަދު އިނާހެވެ.

އަހަރަކު ދެ ފަހަރު ނެރޭ މި މަޖައްލާގެ ލިޔުންތަކަކީ ވަރަށް ތަފާތުކޮށް ކިއުންތެރިންނަށް ގެނެސްދީފައިވާ ލިޔުންތަކެއް ކަމަށް ޔާސިރު ބުންޏެވެ.

"…މި ގޮތުން ބަޔޯޑައިވާސިޓީއާއި މަސްވެރިކަމާއި ތާރީޚާއި ސަގާފަތް ހިމެނޭހެން ތިން ބަޔަށް އާޓިކަލްތައް ބަހާލައިފައިވާއިރު، އާޓިކަލްތަކުގައި ސައިންޓިފިކް ގޮތުން އެނގެން ހުރި މައުލޫމާތުތަކާއި ދިވެހިރާއްޖެއާއި، ރާއްޖޭގެ ކަނޑުގައި އުޅޭ މަސްމަހާމެއްސާއި، ރާއްޖޭގައި އުޅޭ ދޫނިސޫފާސުއްޕާއި ދިވެހިރާއްޖެއާއި ހުރި ގުޅުންތަކާއި، ދިވެހިންނާއި މި ދިރުންތަކާއެކު ކުރެވިފައިވާ ތަޖުރިބާތައް ލިބެން ހުރި މިންވަރަކުން ގެނެސްދީފައި ވާނެ،" ކުރިން "ހަވީރު" ގައި މަސައްކަތްކުރި ޔާސިރު ބުންޏެވެ.

މި މަޖައްލާގެ ފުރަތަމަ އަދަދުގެ ބޭރުގަނޑުގައި ވަނީ ފުވައްމުލަކު ކަނޑުގައި އުޅޭ ޓައިގަރ ޝާކްގެ ވާހަކައެވެ. މިއީ ބައިނަލްއަގުވާމީ ގައުމުތަކުގައި ވެސް ޑިސްޓްރިބިއުޓްކުރެވޭ މަޖައްލާއެކެވެ. މީގެ ތެރޭގައި އެމެރިކާ އިނގިރޭސި ވިލާތް އަދި އިންޑިއާ ހިމެނެއެވެ.

"މި މެގެޒިންގެ އާޓިކަލްތަކަކީ ކިޔުންތެރިންނަށް ފަސޭހައިން ކިޔޭ ގޮތަށް ކުދި ބްލޮކް ގޮތަށް ލިޔެ ފޮޓޯއާއި އިލަސްޓްރޭޝަން ހިމަނައިގެން ވަރަށް ތަފާތުކޮށް ނެރެފައިވާ މަޖައްލާއެއް. މިއީ ރާއްޖޭގައި މިހާތަނަށް އެންމެ މީހަކު މަޖައްލާގެ ހުރިހައި އާޓިކަލްތައް ލިޔެ ޝާއިއުކޮށް ނެރޭ ފުރަތަމަ މަޖައްލާ،" ޔާސިރު ބުންޏެވެ.

މަޖައްލާގެ ލިންކް: