މޯލްޑިވްސް ޕޯޓްސް ލިމިޓެޑް (އެމް.ޕީ.އެލް)ގެ 40 ވަނަ އަހަރީ ދުވަސް ފާހަގަކުރުމަށް "ސްޓާފް ނައިޓް" ބާއްވައިފިއެވެ.

ހުޅުމާލޭގެ ފަރުކޮޅުފުށީގައި ހުކުރު ދުވަހުގެ ރޭ ބޭއްވި މި ހަފްލާ ޝަރަފުވެރިކޮށްދެއްވީ މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރެވެ. އަދި ޚާއްސަ މެހެމާނެއްގެ ގޮތުގައި ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ބައިވެރިވެވަޑައިގަތެވެ. މީގެ އިތުރުން އެމް.ޕީ.އެލްގެ ސީ.އީ.އޯ ކެޕްޓަން ޙުސައިން ޝަފީޤާއި ކުންފުނީގެ ވެރިންނާއި ގިނަ އަދަދެއްގެ މުވައްޒަފުންވެސް ބައިވެރިވި އެވެ.

މި ރަސްމިއްޔާތުގައި ވާހަކަދައްކަވަމުން ޒަރީރު ވަނީ ބަނދަރުގެ ޚިދުމަތް ފޯރުކޮށްދިނުމުގައި އެމް.ޕީ.އެލްގެ މުވައްޒަފުން ކުރަމުންދާ ބުރަ މަސައްކަތުގެ އަގު ވަޒަންކުރައްވައިފައެވެ.

"އެމް.ޕީ.އެލް އަދާކުރަނީ ހަމައެކަނި ވިޔަފާރި ކުންފުންޏެއްގެ ދައުރެއް ނޫން. މިއީ މުޅި ގައުމުގެ އިގުތިސާދީ ސަލާމަތާއި ރައްޔިތުންގެ ދިރިއުޅުމާ ސީދާ ގުޅިފައިވާ ގައުމީ ބޮޑު ޚިދުމަތެއް،" ޒަރީރު ވިދާޅުވިއެވެ.

އެމް.ޕީ.އެލްގެ ސީ.އީ.އޯ ޝަފީގު ވިދާޅުވީ މާލޭ ވިޔަފާރި ބަނދަރުގައި މި ވަގުތު ގިނަ ދަތިތަކެއް ހުރި ނަމަވެސް، ޤައުމަށް ބޭނުންވާ ކާބޯތަކެއްޗާއި މުދާ ރޭގަނޑާއި ދުވާލު، ވާރެއާއި އަވީގައި ފޯރުކޮށްދިނުމަށް އެމް.ޕީ.އެލްގެ މުވައްޒަފުން ކުރަމުންދާ ބުރަ މަސައްކަތަށް ޝުުކުރު އަދާކުރައްވާ ކަމަށެވެ.

އަދި މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫޢު ފަށާފައިވާއިރު، މއީ މި ވަގުތު ބަނދަރަށް ދިމާވެފައިވާ ދަތިތައް ހައްލުވާނެ މަޝްރޫޢެއްކަން ޝަފީގު ފާހަގަކުރެއްވިއެވެ.

މި ހަފްލާގައި ފާއިތުވި އަހަރު ހަތަރު ކެޓަގަރީއަކުން އެންމެ ރަނގަޅު މުވައްޒަފުންނަށް ވަނީ އެވޯޑް ދީފައެވެ. މީގެ އިތުރުން އިތުރުން 35 އަހަރަށް ވުރެ ދިގު މުއްދަތަކަށް ޚިދުމަތްކޮށްފައިވާ މުވައްޒަފުންނަށް ހަނދާނީ ފިލާ ހަވާލުކުރެއްވުމާއި، ރިޓަޔާޑް މުވައްޒަފުންނަށް ހަނދާނީ ފިލާ ހަވާލުކުރެއްވުންވެސް މި ހަފްލާގައި ކުރިއަށް ގެންގޮސްފައިވެ އެވެ.

އަދި، އުމުރުން 20 އަހަރުގައި ޤުރުއާން ހިތުދަސްކޮށް، ޙާފިޡުކަމުގެ ސަަނަދު ހާސިލްކޮށްފައިވާތީ، އެކަމުގެ އަގުވަޒަންކޮށް، ހިތްވަރު ދިނުމުގެ ގޮތުން އަލްހާފިޡު ޚުސައިން ޒައިން ޢަލީ އަށް ވަނީ ޚާއްސަ އެވޯޑެއް ދީފައެވެ.