ގައުމީ ފުޓުބޯޅަ ޓީމުގެ ކޯޗު އަލީ ސުޒެއިން ކޮވިޑުން ސަލާމަތްވެގެން ގަތަރަށް ގޮސް މިއަދު ޓީމާ ހަވާލުވެއްޖެއެވެ. ސުޒެއިން ޓީމާ މި ގުޅުނީ މި މަހު 10 ގައި ޓީމު ދޯހާ އަށް ފުރަން އުޅެނިކޮށް އޭނާ ކޮވިޑަށް ޕޮޒިޓިވްވުމުން ކަރަންޓީނުގައި މަޑުކުރުމަށްފަހު، ދެ ދުވަސް މަތިން ތިން ފަހަރަށް ޓެސްޓްކޮށްގެން ނަތީޖާ ނެގެޓިވްވުމުން، ރޭގެ ފްލައިޓުން ގަތަރަށް ގޮހެވެ.
ގައުމީ ޓީމު ތައްޔާރުވަމުން މި އަންނަނީ އަންނަ އޮކްޓޯބަރު މަހުގެ 1-16އަށް ގަލޮޅު ދަނޑުގައި ކުޅުމަށް ހަމަޖެހިފައިވާ ސާފް ޗެމްޕިއަންޝިޕް ފުޓުބޯޅަ މުބާރާތަށެވެ. ސަރަހައްދުގެ ފަސް ގައުމު ވާދަކުރާ މި މުބާރާތުގެ އެންމެ ފަހުގެ ޗެމްޕިއަނުންނަކީ ރާއްޖެއެވެ. ރާއްޖޭގެ އިތުރުން މި މުބާރާތުގައި ދެން ވާދަކުރަނީ ބަންގްލަދޭޝް، އިންޑިއާ، ނޭޕާލް އަދި ސްރީލަންކާއެވެ.
ގަތަރު އެއާވޭސްގައި ރޭ ދޯހާއަށް ދަތުރުކުރަމުން، "އަދިވެސް"އާ ފޯނުން ވާހަކަ ދައްކަމުން ސުޒެއިން ބުނީ "ޓީމާ އަލުން ގުޅެވޭތީ ވަރަށް އުފާކުރަން" ކަމަށެވެ.
"ޓީމާ އަލުން ގުޅެވޭތީ ވަރަށް އުފާކުރަން. ހުރިހައި ކަމެއް ވެސް ވަރަށް ރަނގަޅަށް އަދި ދަނީ. އެހެންވެ މުބާރާތާ ދޭތެރޭ ވަރަށް އުންމީދު އެބައޮތް،" ސުޒެއިން ބުންޏެވެ.
ސުޒެއިން ބުނީ އެސިސްޓެންޓް ކޯޗު އިސްމާއިލް މަހެފޫޒު (އިންމަ)ގެ ބެލުމުގެ ދަށުން ދޯހާގައި ޓީމުގެ ޕްރެކްޓިސް ކުރިއަށް ގެންދިޔައީ އޭނާ ތައްޔާރުކުރި ޕްލޭނާ އެއްގޮތަށް ކަމަށެވެ. އަދި އޭނާ ގޮސް އެންމެ ފަހުގެ ތައްޔާރީތައް ވާނެ ކަމުގައި ސުޒެއިން ބުންޏެވެ.
Our care taker coach @alisuzain has departed tonight to join the team in Doha, Qatar.
Wishing coach a safe trip and a successful training camp 🇲🇻🙏🏽#mageymahaldheeb #aharungebank pic.twitter.com/WQMD82VcfR
— Bassam Adeel Jaleel (@bassam_jaleeI) September 20, 2021
ސުޒެއިން ބުނީ ގަތަރުގެ ދެވަނަ ޑިވިޝަންގެ ޓީމަކާއެކު މިއަދު ޕްރެކްޓިސް މެޗެއް ކުޅުމަށް ހަމަޖެހިފައިވާ ކަމަށާއި ޓީމުގެ ފެންވަރު ބަލައިލުމަށް މި މެޗަކީ ވަރަށް މުހިންމު މެޗަކަށް ވާނެ ކަމަށެވެ.
ތަމްރީނު ދަތުރަށްފަހު ގައުމީ ޓީމު އެނބުރި މާލެ އަންނާނެ ދުވަހެއް އަދި ފައިނަލްނުވާ ކަމަށް ސުޒެއިން ބުންޏެވެ.
- ވިދާޅުވުމަށް: 22 ވަނަ ކޮވިޑް ޓެސްޓުން ސުޒެއިން ޕޮޒިޓިވްވީ ކީއްވެ؟