އިސްމުފުޅުން މަތިވެރިވީ ބިސްމި ކިޔައިގެން ފަށަނީ
ދަންނަ ރިވެތި ބަސްމަގަކުން ޙަމްދާ ޞަލަވާތް ކިޔަނީ
އަދަކީ މިނިވަން ދުވަހޭ ދިވެހީންނަށް އައި ދުވަހޭ
ޖުލައި މަހުގެ ސައްބީހޭ ފާހަގަވާ މީ ދުވަހޭ
މިނިވަން ކަމަކީ އުފަލެއް ފިނިކަން ލިބިދޭ ހިޔަލެއް
ގިނަގިނައިން ޙަމްދާކޮށް ޝުކުރުގެ ކުރަމާ ޢަމަލެއް
ބައެއްގެ ހުރި އިހުސާނުން ތަނަށް އެވީ ގުރުބާނުން
ގެނައި މި ބޮޑު މިނިވަންކަން ޖެހޭ މިތާ ދަމަހައްޓަން
އަމާނަތޭ އަމާނަތޭ ގައުމީ ބޮޑު އަމާނަތޭ
ދީނުގެ މާތް ކަރާތޭ ގައުމީ ހެޔޮ ސަގާފަތޭ
ރައްކާތެރި ވާން ޖެހެއޭ ރައްކާ ކުރެވެން ޖެހެއޭ
ޝައްކާ ވަހުމެއް ނުވެއޭ ފައްކާ މީ ދިވެހީންނޭ
ގައުމީ އެކިއެކި ބަޠަލުން ގައުމަށް އޮހޮރާލި ދަލުން
ގައުމަށް އައި ނުރައްކަލުން ގައުމު ސަލާމަތް ކުރިއޭ
ބޮޑުތަކުރެއް ހަނދުމަ ވެއޭ އޮޑިއާ ދަތުރަށް ފުރިއޭ
ކޮނޑުގާ ވާޖިބު އެޅިއޭ ބޮޑުވި ޖިހާދެއް ކުރިއޭ
ގޯވާ ކަޅު ރާޖާއޭ ޕޯޗުގިޒީ ފައުޖާއޭ
ދޯކާދީ ބޭރުކުރީ ލޯބިން ޖެހި އުންޑައިންނޭ
ބޭރުން އައި ހޮޅިންތަކޭ ފޭރިގަތީ މިބިންތަކޭ
ރޭރުވެގެން މަގުދެއްކީ އޭރުގެ ޚާއިނުންތަކޭ
އޮތް ވެރިކަން ފުރޮޅައިލީ ކޮށް އަނިޔާ ގިނަގުނަވީ
އޮތް ހާލަށް ހިތް މޮޅިވީ ދޮންބަންޑާރައިން ތެދުވީ
ރައްކާތެރި ވީ މަގަކުން ދައްކާ ހިއްވަރު އަމުދުން
ފައްކާވީ ހެވި ހުނަރުން ލަޝްކަރު އޮތް ދުއްވާލީ
ދާދި ފަހުން އައި ބައެކޭ ޚާއިނަކާ ގުޅިގެންނޭ
ބާޣީ ކެހިވެރި ބައެކޭ ޕްލޮޓް ކިޔާ ބައިގަނޑެކޭ
ދިން ހަމަލާ ކުރިމައްޗަށް ހިންދެމިލީ ފައިމައްޗަށް
ވެއްޓެންދެން ބިންމައްޗަށް ހިއްވަރު ކުރި މާ މައްޗަށް
ޒުވާން ހުސެން އާދަމަކީ އެއީ ފަހުގެ ކުޑަތަކުރޭ
ސަލާމަތުން ގައުމު އެކީ ސަމާލު ކުރި ޝަހީދެކޭ
ނޫކަށި އަދު ޒުވާނުނޭ ރޫހު އަލުން ދިރިގެންނޭ
ހޫނު ލެޔާ ވިންދުންނޭ ދޫނުމެކޮށް އަންނާށޭ
ވިހާ ބޮޑުވި އިމާރާތޭ އިހާނަތެއް ނުމެ ވާށޭ
އިހާ ފަހަށް ވިސްނައިގެން ޖިހާދު ގައި ތެދުވާށޭ