މާލޭ ދެކުނު ފަރާތު ފަޅުގައި އަޅައިފައި ހުންނަ ލޯންޗުފަހަރުން އެކިއެކި އާލާތްތައް ވަގަށް ނަގާ މީހަކު، ލޯންޗެއްގެ ބުރަފަތި ނައްޓާލައިގެން ދަނިކޮށް އަތުލައިގަނެ މިއަދު ފުލުހުންނާ ހަވާލުކޮށްފިއެވެ.

މަންޒަރު ދުށް މީހަކު ބުނީ މޭރީ ބްރައުނުން ފެށިގެން ފިއުލް ސަޕްލައިއާ ދެމެދު ފަޅުގައި އަޅައިފައި ހުންނަ ލޯންޗުފަހަރުން ބުރަފައްޗާއި ހުންގާނާއި ގިއަރުބޮކްސް އާއި މީޓަރު ފަދަ ތަކެތި އަބަދުވެސް ވަގަށް ނަގާ ކަމަށާއި މިއަދު ހަވީރު ޒުވާނަކު އަތުލައިގަތީ ލޯންޗެއްގެ ބުރަފަތި ނައްޓާލައިގެން ކޮނޑަށްލައިގެން ދަނިކޮށް ކަމަށެވެ.

"މިއީ ވަރަށް ބޮޑުވެއްޖެ މައްސަލައެއް މިހާރު. ކޮންމެވެސް ލޯންޗަކުން ކޮންމެވެސް އެއްޗެއް ހަމަ ކޮންމެ ދުވަހަކު ވެސް ވަގަށް ނަގާ. ޕާޓޭންގެ ކަންތައް މިއީ. މިއަދުވެސް ލޯންޗަކުން ބުރަފައްޗެއް ނައްޓާލައިގެން ކޮނޑަށްލައިގެން ދަނިކޮށް އެ މީހާ އަތުލައިގަތީ،" އޭނާ ބުންޏެވެ.

މިއަދު އިރުއޮއްސުނު ގަޑީގައި ބުރަފަތި ނައްޓާލައިގެން އެ މީހާ ހިފައިގެންދާ މަންޒަރު، އެހެން ލޯންޗެއްގެ ފަޅުވެރިއަކު ވަނީ ވީޑިއޯވެސް ކޮށްފައެވެ. އެ ވީޑިއޯ އާއި އޭނާގެ ފޮޓޯތައް ވަނީ މީސްމީޑިއާގައި ދައުރުވާން ފަށައިފައެވެ.

Launch faharun aalaaiythah vagah nagaa meehaku athulaigenfi. pic.twitter.com/ZZpyzX4T4D

— fisaarithedhu (@fisaarithedhu) June 13, 2021

އެ ސަރަހައްދުގައި ހުންނަ ބައެއް ލޯންޗުފަހަރަކީ ރަށްރަށަށް ދަތުރުކުރާ ލޯންޗުފަހަރު ކަމަށް ވިޔަސް، ބައެއް ލޯންޗުފަހަރަކީ މަސް ދަތުރު ދިއުމަށް ޒުވާނުން ބޭނުންކުރާ ލޯންޗުފަހަރެވެ.

"މަސް ދަތުރު ނިންމައިފައި (ގެއަށް) ދަނީ ޖީ.ޕީ.އެސް ހިފައިގެން. ޖީ.ޕީ.އެސް ގެންދިޔަސް، އިންޖީނާއި ބުރަފައްޗާއި ގިއަރުބޮކްސް އާއި މީޓަރު ބޮކްސް ކޮންމެ ފަހަރަކު ނައްޓާލައިގެން ގެއަކަށް ނުގެންދެވޭނެ ދޯ. އަނެއްކާ 24 ގަޑިއިރު މީހަކު ވެސް ނުބެހެއްޓޭނެ ލޯންޗު ބަލާކަށް،" މަސް ދަތުރުދާ ލޯންޗެއް ދުއްވާ މީހަކު ޝަކުވާ ކުރިއެވެ. "މިއީ ކޮންމެވެސް ގޮތަކުން ހުއްޓުވެން ޖެހޭ ކަމެއް. ވަރަށް ބޮޑެތި ގެއްލުންތައް މިއީ. މީޓަރު ބޮކްސް އެއްވެސް މި ލިބެނީ 18 ހާސް ރުފިޔާ އަށް."