އޭނާ އަކީ ޑްރަގް އެއްވެސް ނެޓްވޯކަކާ އެއްވެސް ގުޅުމެއް އޮތް މީހެއް ނޫން ކަމަށާއި އޭނާއޭ ކިޔައިގެން ފުލުހުން އެ ހަދަނީ ހުސް ދޮގު ކަމަށް، ޑްރަގް ނެޓްވޯކެއްގެ ޑްރަގު ޑީލެއްގައި ޕާކިސްތާނުގައި ތާށިވެފައި ހުރި ކަމަށް ފުލުހުން ބުނާ މިސްބާހް މުހައްމަދު ބުނެފިއެވެ.

ފުލުހުން ބުނެފައި ވަނީ ގެއްލިގެން ހޯދާތާ ހަތް މަސް ވެފައިވާ، ހދ. ނޮޅިވަރަންފަރު، މޯނިންގސަން، މިސްބާހް މުހައްމަދު ގުޅިފައި ވަނީ ޑްރަގް ނެޓްވޯކަކާ ކަމަށާއި އޭނާ މި ވަގުތު ހުރީ ޑްރަގު ޑީލެއްގައި ޕާކިސްތާނުގައި ތާށިވެފައި ކަމަށެވެ.

"އަހަންނަކީ ޑްރަގް އެއްވެސް ނެޓްވޯކަކާ އެއްވެސް ގުޅުމެއް އޮތް މީހެއް ނޫން. އަހަންނޭ ކިޔައިގެން ފުލުހުން އެ ހަދަނީ ހުސް ދޮގު،" ރީނދޫ ގޮޅިޖެހި ގަމީހެއް ލައި، އަވިއައިނެއް އަޅައިގެން ހުރެ އޭނާ އަމިއްލަ އަށް ނަގައިފައިވާ ވީޑިއޯގައި މިސްބާހު، 25، ބުނެއެވެ.

Gelligen hoadhaa Misbaahu mihiree kon thaaku? pic.twitter.com/sVfZPwVW76

— Intey2020 (@intey2020) June 7, 2021

މި މަހު ދެ ވަނަ ދުވަހު ފުލުހުން ބުނީ، މިދިޔަ އަހަރުގެ ނޮވެމްބަރު 11 ވަނަ ދުވަހުގެ ރޭ މާލޭން ފުރި ފްލައި ދުބާއީގެ ފްލައިޓުން މިސްބާހް، ދުބާއީއަށް ފުރާފައިވާކަން އިމިގްރޭޝަންގެ ރެކޯޑްތަކުން ދައްކާ ކަމަށެވެ. އޭނާ ދުބާއީއަށް ގޮސްފައި ވަނީ ފުޅާ ދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރި ކުރާ ނެޓްވޯކްތައް ރާއްޖޭގައި ހިންގި، ސ. ހުޅުދޫ، ދޭލިޔާގެ، އިރުފާން ތަގިއްޔުއާ އެކު ކަމަށް ވެސް ފުލުހުން ބުނެއެވެ.

މިސްބާހުގެ ދައްތަ ފާތުމަތު ހުދާ މިއަދު ބުނީ އެ ވީޑިއޯ އޭނާ އަށް ވެސް މިއަދު ހަވީރުކޮޅު ފެނުނު ކަމަށާއި، އެއީ ކިހިނެއް ލިބިގެން އުޅޭ އެއްޗެއްކަން އޭނާ އަށް ވެސް ނޭނގޭ ކަމަށެވެ. އަދި މިސްބާހު ގެއްލުނު ފަހުން އެއްވެސް ހަބަރެއް ނުވާ ކަމަށެވެ.

"މިސްބާހު ނުވެސް ގުޅާ އަދިވެސް،" ހުދާ ބުންޏެވެ.

• ވިދާޅުވުމަށް: ގެއްލިގެން ހޯދާ މިސްބާހު ގުޅިފައި ވަނީ ޑްރަގް ނެޓްވޯކަކާ، އޭނާ ހުރީ ޕާކިސްތާނުގައި ތާށިވެފައި