އެއާ އެމްބިއުލާންސްގައި ބޭސްފަރުވާއަށް ރައީސް މުހައްމަދު ނަޝީދު އިއްޔެ ޖަރުމަނުވިލާތަށްގެ ފުރާވަޑައިގެންނެވިއިރު، އެ މަނިކުފާނަށް އެންމެ ޚާއްސަވާނެ އެކައްޗަކީ ހަމަ ޔަގީނުން ވެސް އެއީއެވެ؛ ދަތުރުމައްޗަށް ޚާއްސަކޮށް، ސޫޒަން އިބްރާހިމްފުޅު ތައްޔާރުކޮށްދިން ޚާއްސަ ފަރީއްކޮޅު ޕެކޭޖެވެ.
ރައީސް ނަޝީދުގެ ވަރަށް ގާތް ރަހުމަތްތެރިއެއް ކަމަށްވާ ސޫޒަން "ލޯތްބާއެކު" ތައްޔާރުކޮށްދިނީ ކޮން އެއްޗެއްކަން އެނގޭހެއްޔެވެ؟ ކްރީމުޖެހި ބަނަހާއި ބަޓަރ ކޭކާއި އެގް ސޭންޑްވިޗާއި ޓޫނާ ސޭންޑްވިޗާއި ރޯސްޕާނެވެ.
"ޖަރުމަންވިލާތަށް ވަޑައިގަންނަވާ އިރު ދަތުރުމައްޗަށް، ރައީސް ނަޝީދަށް އެންމެ މީރުފުޅު ފަރީއްކޮޅު "ލޯތްބާއެކު" މި ތައްޔާރުކުރަނީ. ނަޝީދަށް ރައްކާތެރިކަން ދެއްވައި، ހެޔޮ ހާލުކޮޅުގައި އެނބުރި ގައުމަށް ގެނެސްދެއްވާނދޭވެ! ނަޝީދަށް އަވަސް ޝިފާއަކަށް އެދެން،" ސޫޒަން އޭނާގެ ޓްވީޓަރގައި އިއްޔެ ހެނދުނު ބުނެފައިވެއެވެ. (ރައީސް ނަޝީދު ޖަރުމަނަށް ފުރާވަޑައިގަތީ އިއްޔެ 11:30 ވީތަނާއެވެ.)
ރައީސް ނަޝީދު ގެއިން ނުކުންނަވައި ކާރުކޮޅަށް އަރާވަޑައިގަންނަވާ ވަގުތު، ޕާކުކޮށްފައި ހުރި ސައިކަލެއްގައި ބޮމެއް ގޮއްވާލައިގެން އެ މަނިކުފާނު އަވަހާރަކޮށްލުމަށްޓަކައި މޭ ހަވަނަ ދުވަހުގެ ރޭ ދިން ޓެރަރިސްޓް ހަމަލާގައި ޒަހަމްވެގެން، އިތުރު ފަރުވާއަށް ޖަރުމަންވިލާތަށް ވަޑައިގެންނެވީ ޖަރުމަނުގައި ހުންނަވާ ރާއްޖޭގެ އޮނަރަރީ ކޮންސުލް ކްރިސްޓިއަން ވޮން ސްޓެޓެން ހަމަޖައްސަވައިދެއްވި އެއާ އެމްބިއުލާންސެއްގައެވެ. ދަތުރުމަތީގައި އެ ޚާއްސަ ޖެޓުގައި އާއިލާގެ ބައެއް ބޭފުޅުންނާއި ޑޮކްޓަރުންނާއެކު ހޭދަކުރައްވާ 10 ވަރަކަށް ގަޑިއިރުތެރޭގައި ހަމަ ގައިމު ވެސް އެ ފަރީއްކޮޅު ވާނީ ރައީސް ނަޝީދަށް ވަރަށް ވެސް ޚާއްސަ ފަރީއްކޮޅަކަށެވެ. އެކަމަކު ސުވާލަކީ އެއީ ރައީސް ނަޝީދަށް އެންމެ މީރު ފަރިއްކޮޅުހެއްޔެވެ؟
ރައީސް ނަޝީދުގެ ވަރަށް ގާތް އެހެން ރަހުމަތްތެރިއެއް ކަމަށްވާ އަފްޝަން ލަތީފު ބުނާ ގޮތުން ރައީސް ނަޝީދަށް އެންމެ މީރުފުޅު އެއްޗަކީ ކުޅިބަތްޕެނެވެ. އެކަމަކު ކުޅިބަތްޕެން ކައްކާކަށް، ލޯކަލް ގަވަމަންޓް އޮތޯރިޓީގެ ސީ.އީ.އޯގެ މަގާމުގައި ހުރި އަފްޝަން އަކަށް އެއްގޮތަކަށް ވެސް ނޭނގެއެވެ.
"ސޫންތަ (ސޫޒަން) ތިހެން ބުނީމަ މި ހަނދާންވީ. ދާދި ފަހުން ރައީސް ނަޝީދު ކުޑަކޮށް އާލާސްކަންފުޅާ އުޅުއްވާތީ އަހަރެން ދެންނެވިން ކޯންޗެއްހޭ ފަރިއްކުޅުވަން ބޭނުމީ. ވިދާޅުވި ކުޅިބަތްޕެނޭ. އެކަމަކު ކުޅިބަތްޕެން ކައްކާކަށް އަހަންނަކަށް ނޭނގޭ. އެހެންވެ މޭވާކޮޅެއް އެރުވީ. (އޭ.ޑީ.ކޭގެ އައި.ސީ.ޔޫގައި އޮންނަވަނިކޮށް) ރޭގައި ވެސް، (މޭ 12 ވަނަ ދުވަހުގެ ރޭ ވެސް) މޭވާކޮޅެއް އެރުވިން. (ކުޅި)ބަތްޕެން ހަދާކަށް ނުޅޭނަން. (ސޫޒަންގެ) ތި ޕެކޭޖް ހިއްޕަވައިގެން (ރައީސް ނަޝީދު) ފުރާވަޑައިގަތީމަ ވަރަށް އުފާވޭ،" ޓްވިޓަރގައި އަފްޝަން ބުނެފައިވެއެވެ.
Soontha this reminds of the time he was not feeling well recently and I offered to send something. Said kulhibaiypen. I have no idea how to make it so we settled on fruits. We got to take some fruits last night too, would never risk a baiypen 😑. So glad he has your food!
— Afshan Latheef 🎈 (@AfshanLatheef) May 13, 2021
ހަގީގަތުގައި މިއީ ކިތަންމެހާ ވެސް އަމިއްލަ ވާހަކަތަކެއް ކަމަށްވިޔަސް، މި ހުރިހާ ވާހަކައެއް ވެސް މި މީހުން ދައްކާފައި މި ވަނީ އެންމެނަށް ވެސް ފެންނާނެހެން، ޓްވީޓަރގައެވެ. އެހެންވެ، އެ ފަރީއްކޮޅު ޕެކޭޖު އެރުވުމުން އެކަމާ ހިތްހަމަނުޖެހުނު ބައެއް މީހުން ވެސް އެބައުޅެއެވެ. އެކަމަކު އެކަމަށް ސޫޒަން ވެސް އަދި އަފްޝަން ވެސް ފަރުވާލެއް ނުބަހައްޓައެވެ.
ފްލައިޓުގެ ކްރޫންނަށް ކާން ހެދީ ކޮންއެއްޗެއްތޯ މީހަކު ސޫޒަންއާ ސުވާލުކުރުމުން އޭނާ ބުނީ "ކްރޫންވެސް މި ފަހަރު ބޯންޖެހޭނީ ބަތްޕެން" ކަމަށެވެ. އެހެންވެ، އެ ޚާއްސަ ފަރީއްކޮޅު ތެރޭގައި ކުޅިބަތްޕެން ފުޅިއެއް ވެސް ހުރިކަން ޔަގީންވީއެވެ. ނަން ފެންނަން ނެތީއެވެ. އަފްޝަން އަށް ނޭނގުނަސް، ސޫޒަނަށް ކުޅިބަތްޕެން ކައްކަން ވެސް އެނގޭކަން ކަށަވަރުވީއެވެ.
ނަޝީދުގެ ޚާއްސަ ފަރީއްކޮޅު އިއްޔެ ޕެކްކުރަމުންދިޔައިރު ސޫޒަންގެ ހަނދާންތައް ގޮސް ގުޅުނީ މީގެ ދުވަސްތަކެއް ކުރިއާއެވެ.
"ނަޝީދުގެ ފަރީއްކޮޅު ޕެކްކުރަމުންދިޔައިރު އަހަރެންގެ ހަނދާނަށް އައީ އަހަރެންގެ ވިހީގެ އަހަރުތަކުގެ ފަހުކޮޅު، އަސްލެއް ނެތް ޓެރަރިޒަމްގެ ތުހުމަތެއްގެ ހައްޔަރުގައި 82 ދުވަހު ޖަލުގައި ބޭންދުމަށްފަހު އަހަރެން ދޫކޮށްލި ދުވަސް. އެތަނުން ދިން ނަފްސާނީީ އަދި ޖިސްމާނީ އަނިޔާގެ ސަބަބުން އޭރު އަހަރެން ހުރީ ވަރަށް ބޮޑު ޑިޕްރެޝަނަކަށް ގޮސްފައި. ނަޝީދު އެ ދުވަހު ވިދާޅުވި، 'ސޫޒަން! މިގެއަށް ކޮންމެ ދުވަހަކު ހެނދުނު ސައިބޯން އަންނަންވާނެ.' އެ ދުވަހު އަހަންނަށް އެހާ ހިތްވަރު ދެއްވައި އަދި ފަރިއްކުޅުވުމުގައި ވެސް ބައިވެރިކުރައްވާފައިވާއިރު، އެ ލޯބިކަން ހިތުން ފިލުވާލާނީ ކިހިނެއް؟ އިރާދަކުރެއްވިއްޔާ ނަޝީދު އެނބުރި ވަޑައިގަންނަވާނީ މާ ހިތްވަރުގަދަކޮށް."
You literally dragged me by my hands to your home & said, ‘Susan, Migeyah konme dhuvahaku hendhunu saiboan ahnan vaane!’ 🥺♥️
As much as you gave me hihvaru & love, you shared your food with me. One cannot forget such loabikan. In Sha Allah, you will return to us stronger 🙏🏽 pic.twitter.com/Tt8O7Zr3Xw— Susan 🔆 (@SusanIbrahim) May 13, 2021